Nókis qalasında jol infrastrukturasın jáne de jaqsılaw hám transport háreketi qáwipsizligin támiyinlew maqsetinde Sabır Kamalov kóshesinde ońlaw jumısları alıp barılıp, aymaq kúni-túni, 24/7 rejiminde jumıs alıp baratuǵın kewil ashar kóshege aylandırılıwı rejelestirilmekte.
Joybar sheńberinde Sabır Kamalov kóshesiniń Sayaxatshılar kóshesinen – Ǵárezsizlik kóshesine shekemgi bolǵan 600 metr bólegi hám Ǵárezsizlik kóshesiniń Ernazar Alakóz kóshesinen – Sabır Kamalov kóshesine shekemgi bolǵan 430 metr aralıǵı jańasha kóriniske keltiriledi. Sonıń menen birge, avtomobil jolları keńeytiledi hám eni 15 metrge jetkeriledi. Sonday-aq, avtomobil jolınıń eki tárepine beton qaplamalı salmalar, piyadalar ushın qolaylı jollar qurıw hám túngi jaqtılandırıw úskenelerin ornatıw rejelestirilgen.
Qaraqalpaqstan Respublikası Joqarǵı Keńesiniń komitet baslıǵı Islam Sdikov, Qaraqalpaqstan Respublikası Ministrler Keńesi Baslıǵınıń orınbasarı Timur Yusupov, Qaraqalpaqstan Respublikası Avtomobil jolları bas basqarmasınıń baslıǵı Umrbek Matnazarov hám Nókis qalasınıń hákimi Abatbay Daniyarov usı aymaqqa barıp, ámelge asırılatuǵın jumıslar menen ornında tanıstı hám keleshekte orınlanatuǵın wazıypalar boyınsha kórsetpeler berdi.
Bul jumıslar juwmaqlanǵannan soń, aymaq zamanagóy, qolaylı hám qáwipsiz, sonday-aq, kewilashar ortalıqqa iye kóshege aylanıwı kútilmekte.

Qaraqalpaqstan xabar agentligi