Jasalma intellekt texnologiyalarınıń tez rawajlanıwı jurnalistika tarawında qarama-qarsı pikirlerdi júzege keltirdi. Bir tárepten, jasalma intellekt jurnalistlerdiń jumısın jeńillestirip, tezlik hám nátiyjelikti arttırmaqta. Ekinshi tárepten bolsa, bul texnologiya kásiptiń keleshegi ushın qáwip tuwdırıp atırǵanı haqqında qáweterler bar.
Búgingi kúni jasalma intellekt sport nátiyjeleri, finanslıq esabatlar hám statistikalıq maǵlıwmatlar tiykarında avtomatikalıq xabarlar jaratpaqta. Bul bolsa, ǵalaba xabar qurallarına informaciyanı tez jetkeriw hám jurnalisttiń analitikalıq jáne dóretiwshilik jumıslar ushın waqtın únemlew imkaniyatın bermekte.
Sonıń menen birge, qánigeler jasalma intellekt jurnalistikanıń tiykarǵı principleri – ádep-ikramlılıq, sın kózqarastan pikirlew hám sociallıq juwapkershilikti tolıq támiyinley almaytuǵının atap ótedi. Jasalma intellektke hádden tıs iseniw nadurıs yamasa bir tárepleme informaciya tarqalıwına alıp keliwi múmkin.
Juwmaqlap aytqanda, mashqala jasalma intellekttiń ózinde emes, al onnan jurnalistlerdiń qalay paydalanılıp atırǵanında bolıp tabıladı. Sonlıqtan, jasalma intellekt jurnalisttiń ornın basıwshı emes, al onıń járdemshisi sıpatında qollanılǵanda ǵana jurnalistika rawajlanadı. Bolmasa, insan faktorınıń azayıwı tarawdıń sociallıq áhmiyetine unamsız tásir kórsetiwi múmkin.

Biybisara Jartıbaeva,
Berdaq atındaǵı QMUdıń 2-kurs magistrantı.
Qaraqalpaqstan xabar agentligi.