Elimizde jaslardı qollap-quwatlaw, olardıń intellektuallıq potencialın júzege shıǵarıw hám zamanagóy kásiplerge baǵdarlaw mámleketlik siyasattıń tiykarǵı baǵdarlarınan birine aylanǵan.
Usı maqsette, Ózbekstan Liberal-demokratiyalıq partiyası Qaraqalpaqstan Respublikası Keńesi tárepinen de aymaqlarda “Kreativ isbilermen jaslar” joybarı sheńberinde bir qatar ushırasıw kesheleri shólkemlestirilmekte.
Atap aytqanda, ÓzLiDePten Oliy Majlis Nızamshılıq palatasınıń deputatı Gúljan Xalmuratova qatnasıwında Xojeli rayonında jaylasqan Jaslar social-ekonomikalıq orayında máhálleniń kreativ hám belsendi jasları menen ashıq sáwbet ótkerildi.
Ushırasıwda búgingi kúnde jaslar ushın jaratılıp atırǵan keń imkaniyatlar, ásirese, bilimlendiriw, isbilermenlik, sanlı texnologiyalar hám innovaciya tarawlarındaǵı jańa sharayatlar talqılandı.
Bárshege málim, Ózbekstan Respublikası Prezidentiniń qararına muwapıq, Qaraqalpaqstan Respublikasınıń Xojeli rayonında tikkeley sırt el investiciyaları esabınan zamanagóy Jaslar sociallıq-ekonomikalıq orayı qurılmaqta. 2026-2030-jıllarda bul oraydı rawajlandırıw ushın 400 million AQSh dolları muǵdarında tikkeley sırt el investiciyaların tartıw rejelestirilgen.
Oray aymaǵında IT universiteti, startaplar texnoparki, innovaciyalıq toparlar, joybarlaw ofisleri, óndiris kárxanaları, turaq jaylar, sonday-aq, sociallıq hám mádeniy-aǵartıwshılıq obektlerdiń shólkemlestiriliwi jaslar ushın pútkilley jańa imkaniyatlar esigin ashpaqta. Bul bolsa jaslardıń zamanagóy bilim alıwı, óz biznes ideyaların ámelge asırıwı hám turaqlı jumıs orınları menen támiyinleniwine xızmet etedi.
Ushırasıw sheńberinde ÓzLiDeP Qaraqalpaqstan Respublikası Keńesiniń baslaması menen “Kreativ isbilermen jaslar” joybarı tiykarında “Bir million jasalma intellekt jetekshileri” atamasında ashıq sáwbetlesiw keshesi shólkemlestirildi. Onda deputat Gúljan Xalmuratova, partiya belsendileri, jas qánigeler qatnasıp, jasalma intellekt, sanlı ekonomika hám IT tarawında jaslar ushın ashılıp atırǵan imkaniyatlar haqqında óz-ara pikir alıstı.
Sáwbet dawamında jaslar ózlerin qızıqtırǵan sorawlarǵa juwap alıp, oray aymaǵında keleshekte ámelge asırılıwı rejelestirilgen joybarlarda belsene qatnasıw tilegin bildirdi. Deputat jaslardıń bunday baslamaları partiya tárepinen turaqlı qollap-quwatlanatuǵının atap ótti.

Qaraqalpaqstan xabar agentligi