Aldın xabar bergenimizdey, ÓzLiDeP baslaması menen ámelge asırılıp atırǵan «Máhálleniń isbilermen hayalı” joybarı sheńberindegi tańlawdıń máhálle basqıshları aymaqlarda dawam etpekte.
Atap aytqanda, ÓzLiDeP Qaraqalpaqstan Respublikası hám Xojeli rayonlıq Keńesiniń “Hayal-qızlar qanatı” baslaması menen Xojeli rayonındaǵı “Qumbız,” “Qırqınshı” hám “Shaǵala kól” máhálle hayal-qızlarınıń qatnasıwında tańlawdıń máhálle basqıshı ótkerildi. Ilajda Oliy Majlis Nızamshılıq palatasınıń deputatı Gúljan Xalmuratova qatnasıp, máhállelerde isbilermenlik penen shuǵıllanıp atırǵan hayal-qızlardıń tájiriybesi hám jetiskenliklerin joqarı bahaladı.
“Qırıq qız tekstil” JShJ atelesinde bolıp ótken ilajda isbilermen hám ónerment hayal-qızlardıń jumıs tájiriybesi, kásiplik sheberligi, baslamashılıǵı jáne sociallıq belsendiligi tiykarǵı ólshemler boyınsha bahalandı. JShJ baslıǵı Nargúl Qudaybergenova milliy kiyim-kenshek, kórpe-tósek, milliy hám zamanagóy kelin kóylekler hám toy buyımların islep shıǵarıw menen shuǵıllanadı. Onıń ónimleri tek ǵana jergilikli bazarda emes, al qońsı mámleketlerde de úlken talapqa iye.
Nargúl Qudaybergenova jumısında “ustaz-shákirt” dástúrin ámelge asırǵan halda, jaslardı miynetke tartpaqta. Házirgi kúnde ol 52 turaqlı hám 70 máwsimlik jumısshı menen birge islesedi, olardıń kópshiligi shákirtler esaplanadı. Bul tek ǵana jumıs orınların jaratıwda emes, al jaslarǵa kásip hám tájiriybe beriwde de úlken áhmiyetke iye.
Tańlaw sheńberinde «Qırqınshı» MPJdaǵı “Aida’s bakery house” hám «Shaǵala kól» MPJdaǵı “Sarpo Showroom” tekstilinde jumıs alıp barıp atırǵan isbilermen hayal-qızlar da óz joybarları hám jetiskenlikleri menen qatnastı. Olar tárepinen jaratılǵan jumıs orınları, engizilip atırǵan zamanagóy kózqaraslar sonday-aq, máhálleniń sociallıq turmısındaǵı belsene qatnasıwı tóreshiler quramı tárepinen joqarı bahalandı. Ásirese, hayal-qızlardıń bántligin támiyinlew hám sociallıq qollap-quwatlawǵa qaratılǵan baslamalar ayrıqsha atap ótildi hám eń múnásiplerge tańlawdıń keyingi basqıshına jollamalar berildi.

Qaraqalpaqstan xabar agentligi