Ózbekstan Respublikası Ishki isler ministrligi Jámiyetlik qáwipsizlik departamenti málimleme xızmetinen málim etiwinshe, 2026-jıl 1-fevraldan “A” hám “V” kategoriyadaǵı aydawshılıq gúwalıǵın alıw tártibi ózgerdi.
– Ministrler Kabinetiniń 636-sanlı qararına bola, endi teoriyalıq bilimlerdi oqıw orayına barmastan da úyreniw múmkin, – dedi Jámiyetlik qáwipsizlik departamenti málimleme xızmetiniń baslıǵı Muzifa Sultanova. – Yaǵnıy, qáleseńiz onlayn kurslarda, oflayn kurslarda yamasa ózińiz erkin tayarlanıp oqıysız.
Ámeliyat bolsa (rul basqarıw shınıǵıwları) májbúriy bolıp qaladı. Bul shınıǵıwlar mámleketlik yamasa jeke menshik (mámleketlik emes) avtooqıw oraylarında tolıq ótiliwi shárt. Ámeliyat tolıq juwmaqlanǵannan keyin teoriyalıq hám ámeliy imtixan tapsırıladı. Imtixanlardan tabıslı ótkenler aydawshılıq gúwalıǵın aladı.
Ámeliyattıń tamamlanǵanlıǵı haqqındaǵı maǵlıwmatnama qaǵazda emes, elektron túrde rásmiylestiriledi.
Endi “A” hám “V” kategoriyadaǵı transport quralları aydawshıların tayarlaw hám qayta tayarlaw oqıw toparların Mámleketlik jol háreketi qáwipsizligi xızmetinde dizimge alıw tártibi biykar etiledi.

N.Abduraimova, ÓzA