Ózbekstan Respublikası Oliy Majlisi Nızamshılıq palatasınıń deputatı, ÓzXDP frakciyasınıń aǵzası Sayyora Imamovanıń qatnasıwında Beruniy rayonındaǵı 2 hám 3-sanlı texnikumlarda hám Ellikqala rayonındaǵı Ábiw Áliy ibn Sina atındaǵı Jámiyetlik salamatlıq texnikumında Ózbekstan Respublikası Prezidenti Shavkat Mirziyoevtiń Oliy Majliske hám xalqımızǵa jollaǵan Múrájatı jáne “Ózbekstan – 2030” strategiyasında belgilengen tiykarǵı wazıypalardıń mazmun-mánisi hám áhmiyetin túsindiriwge baǵıshlanǵan ushırasıw bolıp ótti.
Onda Ózbekstan XDP Qaraqalpaqstan Respublikası Keńesiniń baslıǵı, Qaraqalpaqstan Respublikası Joqarǵı Keńesindegi ÓzXDP frakciyasınıń basshısı Xalilla Eshimbetov, Beruniy rayonı hákiminiń jaslar siyasatı, sociallıq rawajlandırıw hám ruwxıy-aǵartıwshılıq isler boyınsha orınbasarı Davronbek Karimov, xalıq deputatları Beruniy rayonlıq Keńesindegi ÓzXDP deputatlıq toparınıń aǵzaları, texnikumlardıń oqıtıwshıları, oqıwshıları hám ǵalaba xabar qurallarınıń wákilleri qatnastı.
Ilajda shıǵıp sóylegenler tárepinen atap ótilgenindey, Múrájatta 2026-jıldan baslap aldınǵı sırt el bilimlendiriw baǵdarlamaları engizilgen texnikumlardıń sanı 100 ge jetkeriliwi, dual bilimlendiriw tiykarında oqıp atırǵan 100 mıń oqıwshıǵa stipendiya tóleniwi hám ayrıqsha bahalarǵa oqıp atırǵanlarǵa arttırılǵan muǵdardaǵı stipendiyalar beriliwi belgilengen. Bilimlendiriwdiń teoriya hám ámeliyat penen únlesligi, dual bilimlendiriw sistemasınıń engizilgeni maman kadrlar tayarlawda úlken áhmiyetke iye ekeni ayrıqsha atap ótildi.
Deputatlar bul bilimlendiriw mákemeleriniń jumısı menen jaqınnan tanıstı. 2-sanlı texnikumda zamanagóy oqıw xanaları, avtodrom hám laboratoriyalar shólkemlestirilgen. 3-sanlı texnikumda zamanagóy oqıw xanaları, avtomobil aydaw, ońlaw xanaları hám ustaxanalar arnawlı úskeneler menen támiyinlengen bolıp, oqıwshılar ushın barlıq sharayatlar jaratılǵan. Sonday-aq, sport zalı inventarlar menen támiyinlengen.
Ushırasıwda atap ótilgenindey, kásiplerdi rawajlandırıw hám jańa miynet bazarı sistemasın jaratıw tiykarǵı wazıypa etip belgilengen. 2026-jıldan barlıq aymaqlarda Aldınǵı kásiplik sheberlik texnikumları hám “Kásipler qalashası” shólkemlestiriledi. Sonday-aq, pitkeriwshiler hám jumıs beriwshilerdi baylanıstıratuǵın sanlı ekosistema jolǵa qoyıladı.
Ashıqtan-ashıq sóylesiw tárizinde ótken ushırasıwda qatnasıwshılar ózleriniń pikir-usınısların bildirip, qızıqtırǵan sorawlarına juwap aldı.

Qaraqalpaqstan xabar agentligi