Ózbekstan Liberal-demokratiyalıq partiyası Qaraqalpaqstan Respublikası Keńesi tárepinen “Kreativ isbilermen jaslar” joybarı sheńberinde Nókis rayonı “Qırantaw” APJ aymaǵında jaylasqan qánigelestirilgen mektepte ÓzLiDePten jergilikli Keńes deputatları, partiya belsendileri, jas qánigeler, mektep muǵallimleri hám oqıwshıları qatnasıwında ushırasıw shólkemlestirildi.
Ilajda Oliy Majlis Nızamshılıq palatasınıń deputatı Baxıtbay Aldamuratov qatnasıp, “Deputat hám jaslar” sáwbeti hám “Bir million jasalma intellekt jetekshileri” joybarı sheńberinde jaslar menen ushrastı.
Ushırasıwda atap ótilgenindey, búgingi kúnde málimleme texnologiyaları, jasalma intellekt hám robototexnika tarawlarına bolǵan talap jıl sayın artıp barmaqta. Bul baǵdarlarda bilim hám kónlikpelerge iye bolǵan jaslar miynet bazarında joqarı básekige shıdamlı esaplanadı. Sonlıqtan, ulıwma bilim beriw mekteplerinde IT baǵdarındaǵı dógereklerdiń jumısın rawajlandırıw, robototexnika hám programmalastırıw tiykarların oqıtıw úlken áhmiyetke iye bolmaqta.
“Bir million jasalma intellekt jetekshileri” joybarı sheńberinde jaslar ózleriniń kreativ ideyaları, innovaciyalıq qollanbaları hám isbilermenlik baslamaları menen deputatlardı tanıstırıp, IT tarawındaǵı dáslepki jetiskenlikleri menen bólisti. Deputatlar tárepinen jaslardıń dóretiwshilik hám innovaciyalıq potencialın isbilermenlik penen shuǵıllanıw arqalı júzege shıǵarıw boyınsha bahalı usınıs hám keńesler berildi.
Sonday-aq, “Deputat hám jaslar” ushırasıwı dawamında jaslardıń jámiyetlik-siyasiy belsendiligin arttırıw, olardıń nızam dóretiwshiligi hám mámleketlik basqarıwdaǵı qatnasıwı máseleleri dodalandı. Deputat jaslardı belsendi puqaralıq poziciyasına iye bolıwǵa, mámlekette ámelge asırılıp atırǵan reformalarǵa biypárwa bolmawǵa shaqırdı hám olardı qızıqtırǵan sorawlarǵa hár tárepleme juwap berdi.
Ilaj dawamında ulıwma bilim beriw mekteplerinde jaslardıń potencialın rawajlandırıw, IT tarawında bilim hám kónlikpelerin arttırıw, robototexnika hám zamanagóy sanlı texnologiyalardı engiziw boyınsha ámelge asırılıp atırǵan jumıslar boyınsha prezentaciya ótkerildi.
Ushırasıw juwmaǵında partiya qatarına qabıl etilgen mektep muǵallimlerine aǵzalıq gúwalıqları tapsırılıp, belsendi hám baslamashı oqıwshılar kitaplar menen xoshametlendi.

Qaraqalpaqstan xabar agentligi