Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası prokurorı Sh.Aminovlardıń basshılıǵında Prezidenttiń “Sud hújjetleri hám basqa da uyımlardıń hújjetlerin orınlaw sistemasın bunnan bılay da jetilistiriw ilajları haqqında”ǵı Pármanı talapları tiykarında sud hám basqa da uyımlardıń hújjetlerin orınlaw nátiyjeliligin arttırıw boyınsha Qaraqalpaqstan Respublikası keńesiniń gezektegi keńeytilgen májilisi bolıp ótti.
Májiliste aymaqlıq Keńes aǵzaları, Májbúriy orınlaw byurosı aymaqlıq basqarması, tiyisli ministrlikler hám uyımlardıń juwapker xızmetkerleri, prokuratura hám basqa da juwapker uyımlardıń wákilleri qatnastı.
Sud hújjetleriniń orınlanıwın támiyinlew baǵdarında ayırım áhmiyetli mashqalalardıń saqlanıp qalıp atırǵanı, mámleketlik úlesi bolǵan kárxanalar hám jergilikli hákimliklerdiń qarızdarlıǵı, aukcionda uzaq múddet satılmaǵan múlkler menen baylanıslı mashqalalar keskin sınǵa alındı.
Sonday-aq, aliment óndiriwler hám basqa da áhmiyetli baǵdarlardaǵı hújjetlerdiń orınlanıwına, jumıssız aliment tólewshilerdiń bántligin támiyinlew máselelerine de toqtap ótilip, juwapkerlerdiń túsinikleri tıńlandı.

Qaraqalpaqstan xabar agentligi.