Qońırat rayonında jasawshı T.A.nıń shańaraǵındaǵı kelispewshilik aqıbetinde jas ana R.M. úsh perzentin alıp, ákesiniń úyine ketiwge májbúr boldı. Aradan biraz waqıt ótse de, balanıń ákesi ya perzentiniń, ya ómirlik joldasınıń halınan xabar almadı, materiallıq járdem kórsetpedi.
Perzentlerin jalǵız ózi baǵıp atırǵan ana qıynalǵannan soń, Ózbekstan Respublikası Prezidentine múrájat qaldırıwǵa májbúr boldı. Onıń arzası Májbúriy orınlaw byurosı Qaraqalpaqstan Respublikası basqarmasınıń Múrájatlar menen islesiw bólimine kelip túskennen soń, kórip shıǵılıp, aliment tólewden bas tartıp kelgen ákege shara kóriw ushın Májbúriy orınlaw byurosınıń Qońırat rayonlıq bólimine kórsetpe berildi.
Jaǵday boyınsha sorastırıw háreketleri waqtında qarızdar áke bul jumıstıń aqıbeti jaqsı bolmaytuǵının, ákelik juwapkershiligin sezindi. Onnan derlik 36 million sum aliment qarızı tolıq óndirip alındı.
– Ámeldegi nızamshılıqqa bola, aliment jas óspirim perzentler, sonday-aq, miynetke jaramsız ata-ananıń nızamlı huqıqı esaplanadı, – deydi MOB QR basqarması Múrájatlar menen islesiw sektorınıń aǵa inspektorı Qahraman Tursınbaev. – Onı tólew minnetinen bas tartıw nızam aldında juwapkershilikke alıp keliwi múmkin. Qońıratlı alimentshı ákeniń qılmısı da bunıń ayqın dálili boladı.
Aliment qarızdarlıǵı tolıq óndirilgennen soń, mámleketlik orınlawshılar T.A.ǵa perzentleri ushın belgilengen aliment pulın óz waqtında tólep barıw boyınsha usınısların berip, onıń aqıbetlerin qayta túsindirdi.

Qaraqalpaqstan xabar agentligi.