Jáhán turizm bazarında Ózbekstanǵa bolǵan qızıǵıwshılıq jıldan-jılǵa kúsheyip barmaqta. Bay tariyx, biytákirar arxitekturalıq estelikler, milliy dástúrler hám miymandoslıq mámleketti xalıqaralıq turistler ushın tartımlı jóneliske aylandırmaqta.
Ásirese, sońǵı jılları Evropa mámleketleri, atap aytqanda, Ispaniyadan kelip atırǵan turistler sanınıń artıp atırǵanı Ózbekstannıń turizm tarawındaǵı abırayı artıp atırǵanın kórsetedi.
Ispaniyanıń turizm tarawına qánigelesken “Agenttravel” basılımında járiyalanıwınsha, Ózbekstan Evropa turistleriniń itibarın barǵan sayın kóbirek tartıp atırǵan eń perspektivalı turizm jónelislerinen biri sıpatında óz abırayın bekkemlep atırǵan abıraylı mámleketler qatarında.
Basılımǵa bola, mámleket Albaniya hám Gruziya qatarında dástúriy turistlik marshrutlardan tısqarı jańa tásirler izlep atırǵan turistler ushın tartımlı baǵdarlar qatarına kirgizilgen.
Qızıǵıwshılıqlar, bárinen burın, Ózbekstannıń bay mádeniy miyrası, Oraylıq Aziyaǵa tán ekzotikası hám transport imkaniyatlarınıń jaqsılanıwı menen baylanıslı. Atap aytqanda, Evropa mámleketleri menen aviabaylanıslardıń keńeyiwi, sonıń ishinde, Ispaniyadan tikkeley aviareyslerdiń jolǵa qoyılıwı turistler ushın saparlardı biraz jeńillestirdi.
Sonday-aq, mámleketke kirip kiyatırǵan turistler aǵımınıń turaqlı ósiwi baqlanbaqta. Ózbekstan Ullı Jipek jolı boylap shólkemlestiriletuǵın mádeniy-aǵartıwshılıq sayaxatlar baǵdarlamalarına barǵan sayın kóbirek kirgizilmekte. Samarqand, Buxara hám Xiywa tek ǵana tariyxıy qalalar emes, al ózine tán ortalıq, bay dástúrler hám joqarı miymandoslıqtı jámlegen tolıq túrdegi turizm brendlerine aylanıp barmaqta.
Tarawdaǵı ekspertlerdiń pikirine bola, Ózbekstan xalıqaralıq turizm bazarında jáne de joqarı nátiyjelerge erisiw ushın barlıq zárúr potencialǵa iye.
Infrastrukturanı rawajlandırıw pátlerin saqlap qalıw, sırt elde mámlekettiń turizm imkaniyatların jedel úgit-násiyatlaw hám aviaqatnawlardı qollap-quwatlaw arqalı Ózbekstan evropalı turistler ushın eń áhmiyetli jańa turistlik ashılıwlardan birine aylanıwı múmkin.

Muhayyo Toshqoraeva, ÓzA