Qaraqalpaqstan Respublikası Hákimshilik sudında student-jaslar qatnasıwında «Ashıq esikler kúni» ilajı shólkemlestirildi. Bul baslama jaslardı sud-huqıq sistemasınıń jumısı menen jaqınnan tanıstırıw, sud islerin sanlastırıw arqalı insan faktorın azaytıw, ashıq-aydınlıqtı támiyinlew, sonday-aq, sud sistemasında korrupciyaǵa qarsı gúresiwge qaratılǵan reformalardı keń jámiyetshilikke jetkeriw maqsetinde ótkerildi.
Ilaj dawamında sudyalar tárepinen Hákimshilik sudlardıń tiykarǵı wazıypaları, puqaralar hám yuridikalıq shaxslardıń huqıqların qorǵawdaǵı ornı hám sudlarǵa múrájat etiwde jaratılǵan zamanagóy qolaylıqlar haqqında hár tárepleme maǵlıwmatlar berildi. Ásirese, sud sistemasında engizilgen interaktiv xızmetler, elektron múrájatlar, sanlı sud processleriniń abzallıqları haqqında tolıq túsinikler berildi. Sonday-aq, qatnasıwshılar sud zalları, keńse, arxiv hám basqa da xızmet bólmeleri menen tanısıp, sud jumıslarınıń ámelde qalay shólkemlestirilip atırǵanına gúwa boldı. Bul bolsa, jaslarda sudlarǵa isenim hám qalıs qatnastı qáliplestiriwge xızmet etti.
Ashıq sáwbetlesiw dawamında studentler ushın interaktiv oyın ótkerilip, onda sudyalar tárepinen berilgen huqıqıy sorawlarǵa jaslar juwap beriw menen birge, olardan tolıq maǵlıwmatlar alıw imkaniyatına iye boldı. Belsendi, bilimi hám qızıǵıwshılıǵı menen ajıralıp turǵan studentlerge bolsa ruwxıy-aǵartıwshılıq áhmiyetke iye bolǵan hár qıylı kitaplar sawǵa etildi.
«Ashıq esikler kúni» ilajı jaslardıń huqıqıy sanasın hám mádeniyatın arttırıwda, sudlardıń jumısına bolǵan ashıq-aydınlıq principlerin bekkemlewde úlken áhmiyetke iye boldı.

Qaraqalpaqstan xabar agentligi