Oliy Majlis Nızamshılıq palatasınıń deputatı Gúljan Xalmuratova Qońırat rayonındaǵı Qaratal mákan puqaralar jıyınında bolıp, máhálle belsendileri hám «jetilik» aǵzaları menen ushırastı.
Ushırasıwda Prezidentimizdiń tárepinen kámbaǵallıqtı qısqartıw hám xalıqtıń bántligin támiyinlew boyınsha ótkerilgen videoselektorda usı sistemanıń aldına qoyılǵan wazıypalar dodalandı. Sonday-aq, usı jıldıń 27-yanvar kúni Prezident Sh.Mirziyoevtiń basshılıǵında Tashkent qalasında qáwipsiz ortalıqtı qáliplestiriw hám jámiyetlik qáwipsizlikti nátiyjeli támiyinlew boyınsha úlgili ámeliyattı jaratıw ilajlarına baǵıshlanıp ótkerilgen videoselektor májilisinde belgilep berilgen tiykarǵı wazıypalardıń mazmun-mánisin hám áhmiyetin saylawshılarǵa jetkeriw boyınsha máseleler dodalandı.
– “Jetilik”ke reformalardıń nátiyjeliligin támiyinleytuǵın tiykarǵı kúsh sıpatında qaralıp atırǵanı biykarǵa emes. Sebebi, bul sistemanıń islewi ushın zárúrli barlıq sharayatlar jaratılǵan. Eger máhállede jumıssızlıq yamasa kámbaǵallıq penen baylanıslı mashqalalar kóp bolsa, demek, bul sistemanıń jaqsı islemey atırǵanına baylanıslı, – deydi deputat G.Xalmuratova.
Maǵlıwmat ornında atap ótetuǵın bolsaq, bul máhálledegi 765 shańaraqta 3373 adam jasaydı. Máhálle tiykarınan diyqanshılıq hám sharwashılıq penen shuǵıllanadı. Usı máhálleniń turǵınları ushın ishimlik suwı menen baylanıslı máseleler úlken áhmiyetke iye bolıp, deputat bul máselelerdi saplastırıw hám máhálle turǵınlarınıń turmıs dárejesin arttırıw ilajların qollap-quwatlaytuǵının bildirdi.
Ushırasıwlar dawamında xalıq wákili 41-sanlı ulıwma bilim beriw mektebinde de bolıp, bul jerdegi sharayatlardı kózden ótkerdi. 1991-jılı shólkemlestirilgen bul mektep 3 márte rekonstrukciyalanǵan. Házirgi waqıtta 60 tan aslam pedagog 598 oqıwshı menen jumıs alıp barmaqta.
Deputat muǵallimler hám oqıwshılar menen sóylesip, bilimlendiriw baǵdarındaǵı jańalıqlar, Prezident Sh.Mirziyoevtiń Oliy Majliske hám Ózbekstan xalqına Múrájatında belgilep berilgen altı tiykarǵı baǵdar, sonday-aq, jetilistirilip atırǵan “Ózbekstan – 2030” strategiyasınıń tiykarǵı maqseti hám wazıypaları haqqında tolıq maǵlıwmat berdi.
Itibarlısı, bul mektep 3 márte Baslamalı byudjette jeńimpaz boldı. Sonıń arqasında mektep ushın kerekli ásbap-úskeneler satıp alınıp, gazonlar qurıldı. Bazalıq texnikaları jaqsılandı.
Ushırasıwlar dawamında máhálle turǵınları deputatqa ózleriniń pikir-usınısların, múrájatlerin bildirip, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi