Qaraqalpaqstan Respublikası Ministrler Keńesiniń Baslıǵı F.Ermanovtıń Qıtaydıń “Shenzhen Anxun Technology Co. Ltd.” kompaniyası delegaciyası aǵzaları menen ushırasıwı bolıp ótti.
Ushırasıwda jasıl energiya islep shıǵarıw, joqarı nátiyjeli energiya saqlaw sistemaları hám jańa áwlad esaplaw orayın (Data Centre) jaratıw boyınsha joybarlardı ámelge asırıw máseleleri boyınsha sóylesiwler alıp barıldı.
Kompaniya vice-prezidenti Yu.Veybinniń sózlerine bola, Ózbekstandı tańlawǵa bir qatar faktorlar, sonıń ishinde, “Sanlı Ózbekstan – 2030” baǵdarlaması sheńberinde joqarı texnologiyalı joybarlardı qollap-quwatlaw hám salıq jeńillikleri, mámlekettiń Oraylıq Aziyadaǵı transport-kommunikaciya orayı sıpatındaǵı geografiyalıq jaylasıwı, quyash energetikasınıń úlken potencialı (jılına 3000 saattan artıq quyash nurlanıwı) tiykar bolǵan.
Ushırasıw dawamında tárepler óz-ara birge islesiwdi bunnan bılay da rawajlandırıw, keleshekte anıq joybarlar boyınsha sóylesiwlerdi dawam ettiriw hám tiyisli usınıslar islep shıǵıw boyınsha kelisimge eristi.
Maǵlıwmat ushın, “Shenzhen Anxun Technology Co. Ltd.” kompaniyası 2016-jılı shólkemlestirilgen. Shenchjen qalasında jaylasqan. Jasalma intellekt, esaplaw quwatlılıǵı, kiberqáwipsizlik hám arnawlı ASIC (Samsung) chiplerin islep shıǵarıwǵa qánigelesken Qıtaydıń milliy joqarı texnologiyalıq kárxanalarınan biri bolıp esaplanadı.

Qaraqalpaqstan xabar agentligi