Májbúriy orınlaw byurosı Qaraqalpaqstan Respublikası basqarması hám onıń aymaqlıq bólimleri tárepinen 2025-jıl dawamında ámelge asırılǵan jumıslardıń juwmaqları hám keleshektegi tiykarǵı wazıypalardı belgilew maqsetinde gezektegi kollegiya májilisi bolıp ótti. Onda Byuronıń Qaraqalpaqstan Respublikası basqarması tárepinen 2025-jıl dawamında ámelge asırılǵan jumıslar, erisilgen nátiyjeler hám jol qoyılǵan kemshilikler boyınsha bayanatlar tıńlandı.
Atap ótilgenindey, sońǵı jılları, Prezidentimizdiń baslaması menen mámleketimizde nızam ústinligin támiyinlew, puqaralardıń huqıqları menen erkinliklerin qorǵaw jáne sud hám basqa da uyımlardıń hújjetleriniń sózsiz orınlanıwın támiyinlewge qaratılǵan keń kólemli reformalar ámelge asırılıp, sud-huqıq sisteması túp-tiykarınan jetilistirilmekte.
– Basqarmanıń barlıq aymaqlıq bólimleri hám rayonlararalıq bóliminiń mámleketlik orınlawshıları is júrgiziwindegi ulıwma bahası 5 trillion 879 milliard 592 million sumdı quraytuǵın 584 mıń 704 orınlaw hújjeti boyınsha májbúriy orınlaw háreketleri ámelge asırıldı. Nátiyjede 3 trillion 866 milliard 659 million sumlıq 375 mıń 445 orınlaw hújjeti tamamlandı, sonday-aq, 1 trillion 485 milliard 571 million sumlıq 268 mıń 999 orınlaw hújjetleriniń ámelde orınlanıwı támiyinlendi, – deydi Byuronıń Qaraqalpaqstan Respublikası basqarması baslıǵı Islam Arziev. – Sonday-aq, aliment hám oǵan teńlestirilgen tólemlerdi óndiriw boyınsha 18 mıń 861 orınlaw hújjeti boyınsha orınlaw háreketleri alıp barılıp, 4 mıń 898 orınlaw hújjeti tamamlandı (yamasa saplastırıldı). Házirgi waqıtta usı jıldıń basına qalıp ketken 13 mıń 963 orınlaw hújjeti boyınsha orınlaw háreketleri dawam ettirilmekte.
Materiallıq járdemge mútáj perzentler paydasına jámi 118 milliard sum qarjı óndirilip, sonnan 114 milliard sum aliment alıwshılardıń plastik kartalarına ótkerip berildi.
Májiliste taraw jumısındaǵı unamlı nátiyjeler menen bir qatarda, ayırım rayonlıq bólim baslıqları hám mámleketlik orınlawshılar tárepinen jol qoyılǵan qáte-kemshilikler de sın kózqarastan dodalanıp, olarǵa intizamıy jaza sharaları belgilendi.
Kollegiya májilisiniń juwmaqları boyınsha tiyisli qarar qabıl etildi.

Qaraqalpaqstan xabar agentligi.