Ájiniyaz atındaǵı Nókis mámleketlik pedagogikalıq institutında ziyalılar, jazıwshı hám shayırlar, ilimpazlar, mádeniyat hám kórkem óner ǵayratkerleri, sport tarawınıń pidayıları qatnasıwında ruwxıy-aǵartıwshılıq hám tálim-tárbiya baǵdarında úlken áhmiyetke iye bolǵan másláhátlesiw ushırasıwı bolıp ótti.
Ilajdı instituttıń jaslar máseleleri hám ruwxıy-aǵartıwshılıq isleri boyınsha prorektorı Q. Qodirov basqarıp bardı.
Ushırasıwda Ózbekstan Respublikası Prezidenti Administraciyasınıń juwaplı xızmetkeri S. Yusupov, Qaraqalpaqstan Respublikası Joqarǵı Keńesiniń komitet baslıǵı M. Atamuratov, Respublikalıq ruwxıylıq hám aǵartıwshılıq orayı baslıǵınıń birinshi orınbasarı B.Alimov, oraydıń bólim baslıǵı A. Saidov, oraydıń Qaraqalpaqstan Respublikası bólimi baslıǵı T. Atamuratov hám bir qatar ziyalılar qatnastı.
Ilajda sózge shıqqanlar, elimizde jaslardı hár tárepleme qollap-quwatlaw baǵdarındaǵı alıp barılıp atırǵan jumıslar, jaslar menen islesiwde ilim, bilimlendiriw, mádeniyat, kórkem óner menen sporttıń ornı, qábiletli jaslardı qollap-quwatlaw baǵdarında keń kólemde ilajlar alıp barılıp atırǵanlıǵın atap ótti.
Ziyalılar menen ashıq pikirlesiw ruwxında ótken ushırasıw dawamında jaslardıń ruwxıy dúnyasın bayıtıw, olardı watan súyiwshilik, milliy hám ulıwma insanıylıq qádiriyatlarǵa húrmet ruwxında tárbiyalaw, bul baǵdarda zamanagóy qatnastı engiziw máseleleri boyınsha pikir-usınıslar bildirildi.
Ilaj juwmaǵında bildirilgen usınıs hám baslamalardı ámeliyatqa engiziw, tarawlar arasında óz ara birge islesiwdi bunnan bılay da bekkemlew hám tálim-tárbiya procesin nátiyjeli shólkemlestiriw boyınsha áhmiyetli usınıslar islep shıǵıldı.

Qaraqalpaqstan xabar agentligi