«Óz úyiń, óleń tósegiń» – degen gáp biykarǵa aytılmaǵan. Sebebi, shańaraqlı adamǵa kireyme-kirey júrip kún keshirgennen qıyın nárse joq.
Jańa Ózbekstan sharayatında «Insan qádiri – eń joqarı qádiriyat» dep esaplanıp, xalıqtıń razı etiw ushın kóplegen iri reformalar ámelge asırıldı. Ásirese, Prezidentimizdiń Qaraqalpaqstan Respublikasın sociallıq-ekonomikalıq jaqtan rawajlandırıw maqsetinde shıǵarǵan arnawlı Párman hám qararları xalqımızdıń abadan turmısın támiyinlewde ayrıqsha orın tutpaqta.
Sonıń ishinde, Ózbekstan Respublikası Ministrler Kabinetiniń 2023-jıl 2-fevral kúngi «Qaraqalpaqstan Respublikasında xalıq ushın múnásip turmıslıq sharayatlardı jaratıw hám máhállelerdiń infrastrukturasın jáne de jaqsılaw ilajları haqqında»ǵı 52-sanlı qararı tiykarında, respublikamızdıń barlıq aymaqlarında kóplegen jumıslar ámelge asırıldı.
– Nókis qalası boyınsha usı qarar tiykarında, 1101 járdemge mútáj puqaralardıń turaq jayınıń tóbesi shiferlanıp, oǵada awır sharayatta jasap atırǵanlarǵa jańadan úyler qurıp berildi, – deydi qala hákimliginiń málimleme xızmeti basshısı Elmira Sagalatdinova. – Bunday iygilikli isler qala hákimligi tárepinen ele dawam etpekte.
– Jalǵız ózim perzentimdi tárbiyalap, turaq jayımdı ońlaw múmkinshiligim joq edi, -deydi Isbilemenler aymaǵı mákan puqaralar jıyını turǵını Q. Mırzaǵalieva. – Húrmetli Prezidentimizdiń atalarsha ǵamqorlıǵınıń arqasında, bizlerge de barlıq qolaylı sharayatlarǵa iye zamanagóy úy qurıp berildi. Házir usı úyde tınısh-tatıw, óz-ara awızbirshilik penen turmıs keshirmektemiz. Bunıń ushın elbasshılarına úlken raxmet aytaman.
– Aymaǵımızda 577 xojalıqta 2800 den aslam xalıq jasaydı, -deydi Isbilemenler aymaǵı mákan puqaralar jıyınınıń hayal-qızlar belsendisi Gúlara Babaniyazova. – Ózbekstan Respublikası Ministrler Kabinetiniń 2023-jıl 2-fevral kúngi «Qaraqalpaqstan Respublikasında xalıq ushın múnásip turmıslıq sharayatlardı jaratıw hám máhállelerdiń infrastrukturasın jáne de jaqsılaw ilajları haqqında»ǵı 52-sanlı qararı tiykarında, awır sharayatta jasap atırǵan 3 xojalıqqa jańadan úy salıp berilgen bolsa, 150 xojalıqtıń úyleriniń tóbesi shiferlandı. Sonday-aq, kóshelerge qum-shaǵıl tas aralaspası tóselip, ishimlik suw hám gaz tarmaqları ońlap berildi. Xalıqtıń jumıs penen bántligin támiyinlew boyınsha kóplegen unamlı jumıslar ámelge asırılmaqta.
– Góne jayımız bunnan eliw tórt jıl burın salınıp, tozıwı jetip tur edi, -deydi Turan mákan puqaralar jıyını turǵını Turdıgúl Abdijamilova. – Kúyewim erterekte qaytıs bolıp, 3 perzent penen qalǵan edim. Turmıstıń ǵalma-ǵalı menen bolıp, jayımızdı ońlay almadıq. Sonıń nátiyjesinde, tóbemizden suw ótip ábiger bolıp jasap atırǵan edik. Prezidentimizdiń bizlerdey sociallıq qorǵawǵa mútáj shańaraqlardı qollap-quwatlaw boyınsha baslaması hám respublika húkimetiniń qararı tiykarında, bizlerge de barlıq qolaylı sharayatlarǵa iye jańa úy salıp berildi. Bunıń ushın húrmetli Prezidentimizge, Qaraqalpaqstan Respublikası Joqarǵı Keńesi hám Nókis qalası hákimligine úlken raxmet aytaman. Ilayım, bereket tapsın.
Nókis qalası hákimligi Málimleme xızmeti tárepinen shólkemlestirilgen mediatur dawamında, paytaxtımızda Prezidentimizdiń atalarsha ǵamqorlıǵı menen islenip atırǵan usınday iygilikli islerdi kórip kewlimiz kóterilip, usınday insan qádiri joqarı bolǵan, tınısh mámlekette jasap atırǵanıma maqtanısh ettim.

Adilbay Orazov,
Qaraqalpaqstan xabar agentligi sholıwshısı