Pikir
Hár bir insan qanday da bir tárepi menen basqalardan ajıralıp turadı. Birew aqılǵa uǵras kelmeytuǵın fizikalıq shınıǵıwlardı orınlay alsa, jáne birew uzın-shubay tekstlerdi yadlaytuǵın dárejede kúshli yadqa iye boladı. Negizinde, bulardıń barlıǵı talant esaplanadı. Sonı aytıw kerek, tek kórkem óner hám dóretiwshilik adamları ǵana talantlı degen kóz-qaraslar onsha durıs emes. Sebebi, tákirarlanbas súwret salıwshı xudojnik futbol maydanında 30 minut top tebiwi múmkin emes. Ekewinde de tiykarınan miynet hám talant sáykes keledi. Futbolshıda da, xudojnikte de. Ayrıqsha kúshli hám tez bolǵan insan yadı da talant hám mashaqatlı miynet jemisi.
Tilekke qarsı, búgingi kúnde mine usınday kúshli yadqa iye adamlar azayıp barmaqta. Hár bir rawajlanıwdan gózlengen maqset sózsiz insanǵa qolaylıqtan ibarat. Biraq texnikalıq imkaniyatlardıń keńeyiwi, maǵlıwmatlar deregi óz qolımızda ekenligi este saqlawdıń da tómenlewine alıp kelmekte. Telefon, kompyuter sıyaqlı qurılmalarǵa pútkilley súyenip qalıw aqıbetinde kúndelikli turmıstaǵı ayırım ilimlerdi de umıtıp qoyıp atırǵanımız ashınarlı.
– Bunnan 15-20 jıl burın qálegen adamdı kóshede toqtatıp, qosıq sorasańız, derlik hámme aytıp bere alatuǵın edi. Búgingi kúnde bolsa hátte shayırlardıń kópshiligi de telefonǵa qarap qosıq oqıp beredi, – deydi Samarqand wálayatı Aqdárya rayonındaǵı 40-sanlı ulıwma bilim beriw mektebiniń oqıtıwshısı, shayır Bahrillo Berdiev. – Máseleni biykarǵa qosıqqa baylamadım. Sebebi yadtı bekkemlew, pikirlewdi keńeytiwdiń eń jaqsı sheshimi bul qosıq yadlaw. Sonıń ushın oqıwshılar arasında kitapqumarlıq penen birge qosıq oqıwdı da joqarılatıw zárúr dep oylayman. Ásirese, bahrıbayt oyının ǵalaba túrde kúsheytip, soǵan jarasa xoshametlew máselelerin de shólkemlestirsek, keleshek áwladtıń tábiyǵıy yadın saqlap qalıwǵa muwapıq bolamız. Bul ketiste jasalma intellektke pútkilley baylanıp qalsak, biziń de robottan ayırmashılıǵımız qalmaydı.
Juwmaqlap aytqanda, insannıń ózligin kórsetiwshi eń áhmiyetli faktor onıń mánawiyatı bolıp tabıladı. Ásirese, óziniń biytákirar esteligi hám oy-pikiri menen dańq taratqan Imam Buxariy, Imam Termiziy sıyaqlı ullı insanlardıń áwladları olarǵa múnásip áwlad bolıwı kerek.
Sonda ǵana mámleketimiz basshısı atap ótip atırǵan Úshinshi Renessans dáwirin qura alamız.

Sherbek Islomov, ÓzA