Jańa texnologiyalar payda bolǵanǵa shekem insandı ókpesiz qaldırıp bolmaytuǵın edi, hátte sırtqı qurılmalarǵa jalǵanǵan bolsa da bul júdá qáwipli edi.
AQShtıń CHikago qalasındaǵı Northwestern Medicine klinikasınıń xirurgları imkansız nárseni ámelge asırdı: olar 34 jasar nawqastı 48 saat dawamında ókpesiz ómirde uslap turdı.
Nawqastıń ókpesi kúshli infekciya sebepli shiriy baslaǵan hám bul pútkil deneni záhárlep atırǵan edi. Jańa ókpe ornatıw (transplantaciya) ushın nawqastıń jaǵdayı oǵada awır edi. Xirurglar birden-bir joldı tańladı:
1. Infekciya deregi bolǵan ókpelerdi alıp taslaw.
2. Nawqastı jasalma qan aylanıw hám kislorod penen toyınıw sistemasına (EKMO) jalǵaw.
Qızıǵı sonda, ókpeler alıp taslanǵannan soń, kókirek quwıslıǵındaǵı boslıqta júrek ısırılıp ketpewi ushın shıpakerler waqtınsha kosmetikalıq kókirek implantların tayanısh sıpatında paydalandı.
Eki kún dawamında nawqastıń denesi infekciyadan tolıq tazalandı hám oǵan sáykes donor ókpesi tabıldı. Házirgi waqıtta ol erkin dem alıp atır hám normal turmısqa qaytqan.
Bul waqıya organ kóshirip ótkeriwdi kútip atırǵan, biraq jaǵdayı oǵada awır bolǵan mıńlaǵan adamlar ushın jańa úmit. Endi “jasalma sistemalar” járdeminde insan denesin organsız da waqtınsha ómirin saqlap turıw múmkin.

Qaraqalpaqstan xabar agentligi