Taqıyatas rayonınıń kanalizaciya tarmaqların qurıw hám rekonstrukciyalaw jumıslarına start beriliwi múnásibeti menen saltanatlı ilaj ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı xalqımızdıń turmısında áhmiyetli orın tutatuǵın waqıyalardan biri bolǵan jańa joybardıń baslanıwı múnásibeti menen qutlıqladı.
Atap ótilgenindey, Prezidentimizdiń basshılıǵında elimizdiń barlıq aymaqları qatarında Taqıyatas rayonında da keń kólemli jumıslar ámelge asırılmaqta.
Usı qatarda, bunnan derlik 70 jıl aldın qurılǵan 90 barak úy buzılıp, onda jasawshı puqaralar jańa turaq jaylarǵa kóshirildi. Bunnan tısqarı, usı jılı mámleketlik baǵdarlamalarǵa tiykarlanıp 52 sociallıq hám infrastruktura obektlerinde ulıwma bahası 316 mlrd. sumlıq qurılıs-ońlaw jumısların alıp barıw belgilengen.
Mine, usınday iygilikli ilajlardıń dawamı sıpatında Prezidentimizdiń tapsırması menen qabıl etilgen Ministrler Kabinetiniń 486-sanlı qararı tiykarında “Jáhán banki”niń 78 mln. dollarlıq qarjıları esabınan Nókis qalası, Taqıyatas hám Xojeli rayonlarında 286 kilometrlik kanalizaciya tarmaqları hám obektlerinde qurılıs jumısların alıp barıw názerde tutılǵan.
Taqıyatas rayonındaǵı kanalizaciya sistemaların jańalaw maqsetinde baslanıp atırǵan usı joybar sheńberinde 77,5 kilometrlik kanalizaciya tarmaqları hám 6 nasos stanciyasınıń qurılıs jumısları alıp barılıwı rejelestirilgen.
– Maǵlıwmat ushın atap ótetuǵın bolsaq, ámeldegi kanalizaciya tarmaqları 1951-1956-jıllarda qurılǵan bolıp, 15,9 kilometrlik aqaba suw tarmaqlarınıń búgingi kúnde derlik yarımı (49,1%), sonday-aq, 4 nasos stanciyası hám 1 aqaba suw tazalaw imaratı 100 procent kapital ońlawǵa mútáj jaǵdayda, – deydi «Qaraqalpaq suw támiynatı» AJ direktorı Q.Xalmuratov.
Aqaba suwlar házirgi waqıtta 1989-jılı qurılısı juwmaqlanbaǵan, biologiyalıq tazalawdı támiyinlemeytuǵın bioháwizlerge jiberilmekte. Quwatlılıǵı 7,2 mıń m3/sutka bolsa da, ámelde talaplarǵa juwap bermeydi.
Bul mashqalalardı sheshiw maqsetinde Ministrler Kabinetiniń
arnawlı qararı tiykarında Jáhán banki qatnasıwında “Nókis, Taqıyatas hám Xojelide aqaba suw sistemasın rekonstrukciyalaw” joybarı ámelge asırılmaqta.
Bul joybardıń tolıq juwmaqlanıwı nátiyjesinde rayon xalqınıń kanalizaciya támiynatı házirgi 13 procentten 42 procentke jetkeriledi.
Sonday-aq, kanalizaciya tarmaqlarınan jıynalǵan suwlardı qayta islew arqalı texnikalıq hám xojalıq maqsetlerinde paydalanıw ushın jaramlı suwǵa aylandırıladı hám puqaralardıń qıytaq jerlerine jetkerip beriw jolǵa qoyıladı.

Á.Jiyemuratov,
Qaraqalpaqstan xabar agentligi