“Amazon” korporaciyası strukturada 16 000 jumıs ornı qısqartılǵanın tastıyıqladı. Bul haqqında “Reuters” agentligi xabar berdi. Usı tárizde oktyabr ayınan berli bosatılǵanlardıń sanı shama menen 30 000 ǵa jetti. Quramdı ıqshamlastırıw talap etiliwi itimalı da biykarlanbay atır.
Kárxana basshılıǵınıń málim etiwinshe, bul process bas direktor Endi Jessidiń nátiyjelilikti arttırıw, artıqsha qaǵazpazlıqtı azaytıw hám nátiyjesiz baǵdarlardan waz keshiw siyasatı sheńberinde ámelge asırılmaqta.
Usı kúnlerde “Amazon” qalǵan barlıq fizikalıq sawda formatları – “Fresh” azıq-awqat dúkanı hám “Go” marketleri jabılatuǵının járiyaladı. Sonday-aq, alaqan arqalı toltırıw imkaniyatın beretuǵın “Amazon One” biometriyalıq sistemasınan da waz keship atırǵanı aytıldı.
Múmkin, 30 000 adam shıǵıp atırǵanı 1,58 millionlıq jámáát ushın kóp emes. Solay bolsa da, korporativ xızmetkerlerdiń derlik 10 procentin quraytuǵın bwl muǵdar Amazon tariyxında birden qısqartıw menen baylanıslı eń salmaqlı is bolıp esaplanadı.
Insan resursları boyınsha basshı Bet Galleti bul qarar menen shólkemlestiriw qatlamın qısqartıw, juwapkershilikti arttırıw hám byurokratiyanı saplastırıw maqseti gózlengenin atap ótti. Onıń aytıwınsha, ayırım bólimlerde strukturalıq ózgerisler dawam etedi.
Qánigelerdiń pikirinshe, bul process jasalma intellekt texnologiyaları jedel engizilip atırǵanına da baylanıslı. Kompaniya basshılıǵı aldınraq JI quralların keńnen qollanıw nátiyjesinde ayırım wazıypalar avtomatlastırılıwı, nátiyjede jumıs orınları qısqarıwı múmkin ekenligin bildirgen edi.
Haqıyqatında da, bul xabarlardan keyin kompaniya akciyaları 2,1 procentke tómenlegen.

D.Hakimov, WzA