Ózbekstan Respublikası Prezidentiniń Ekonomikalıq rawajlanıw, nátiyjeli basqarıw hám xalıqaralıq birge islesiw máseleleri boyınsha keńesgóyi Suma CHakrabarti Ózbekstanda ámelge asırılıp atırǵan reformalar, Jáhán sawda shólkemine aǵzalıq, mámleketlik basqarıwdı jetilistiriw hám investiciyalardı tartıw máseleleri boyınsha pikir bildirdi.
Onıń atap ótiwinshe, “Ózbekstan – 2030” strategiyası tiykarında sońǵı jıllarda keń kólemli jumıslar ámelge asırıldı. Kóplegen ekonomikalıq reformalar búgin óz nátiyjesin bermekte, bunı mámleket ekonomikasınıń turaqlı ósiw pátlerinde ayqın kóriw múmkin.
Ásirese, Ózbekstannıń Jáhán sawda shólkemine (JSSh) aǵza bolıwına qaratılǵan processte qatnasqanınan maqtanatuǵının atap ótti. Onıń sózlerine bola, JSShǵa aǵza bolıw strategiyalıq áhmiyetke iye qarar bolıp, bul process kóplegen tarawlarda sistemalı hám tereń reformalardı ámelge asırıwdı talap etti. Usı mániste, JSShǵa aǵzalıqqa umtılıw reformalar ushın áhmiyetli háreketlendiriwshi faktorǵa aylandı.
Sonday-aq, Prezident janında shólkemlestirilgen orınlaw (delivery) bóliminiń jumıs nátiyjelerin de joqarı bahaladı. Atap aytqanda, hayal-qızlar salamatlıǵı, suw támiynatı hám bilimlendiriw infrastrukturası tarawlarında bul bólimniń nátiyjeli jumısı anıq nátiyjeler bergeni atap ótildi. Endi bul tájiriybeni jáne de keńirek kólemde engiziw áhmiyetli ekenligi atap ótildi.
Suma CHakrabarti Mámleketlik basqarıw akademiyası hám “El-yurt umidi” qorı menen birgelikte alıp barılıp atırǵan jumıslarǵa da ayrıqsha toqtap ótti. Bul institutlardı zaman talaplarına sáykes túrde jańalaw hám olardıń mámleketlik xızmet sistemasın rawajlandırıwdaǵı ámeliy tásirin kúsheytiw tiykarǵı maqsetlerden ekeni atap ótildi.
Investiciya máselesine toqtap ótip, sońǵı jılları Ózbekstanǵa salmaqlı sırt el investiciyaları kirip kelip atırǵanın, endi jáne de keń geografiyalıq regionlardan investorlardı tartıw áhmiyetli ekenin atap ótti. Onıń pikirinshe, Ózbekstannıń ashıq, modernizaciyalanıp atırǵan hám biznes júrgiziw ushın qolaylı mámleket sıpatındaǵı imidji bul baǵdarda úlken imkaniyatlar jaratpaqta.
Sonıń ishinde, ótken jılı oktyabr ayında Londonda ótkerilgen investiciyalıq roud-shou (roadshow) ilajınıń tabıslı ótkeni, kóplegen kompaniyalar Ózbekstannıń investiciyalıq potencialı menen birinshi márte tanısqanı atap ótildi. Bıyıl jáne bir qatar investiciyalıq roud-shoulardı, sonıń ishinde, BAÁ hám dúnyanıń basqa da regionlarında ótkeriw rejelestirilmekte.
Sonıń menen birge, investorlar, bárinen burın, huqıqıy kepillikler bekkem bolǵan, kelispewshiliklerdi sheshiw sisteması xalıqaralıq standartlarǵa muwapıq nátiyjeli isleytuǵın mámleketlerdi tańlaytuǵının atap ótti. Sol sebepli, Tashkent Xalıqaralıq kommerciyalıq sudı (TICC) shólkemlestiriliwine úlken úmit bildirip, bul institut investorlar ushın isenimli huqıqıy ortalıq jaratatuǵının atap ótti.
Onıń sózlerine bola, xalıqaralıq dárejede kelispewshiliklerdi sheshiw imkaniyatı Ózbekstanǵa investiciyalar aǵımın jáne de jedellestiredi hám ekonomikalıq ósiwdi qollap-quwatlaydı.

ÓzA