Laboratoriya sharayatında tek ǵana miy qabıǵınıń miniatyura nusqası (organoid) emes, al onıń jeke qan tamırları sisteması da jaratıldı. Bul “mini-miy” házirge shekem jaratılǵan eń jetilisken modellerden biri.

Bunday organoidlar 2013-jıldan berli autizm hám shizofreniya sıyaqlı keselliklerdi úyreniwde járdem berip kelmekte. Biraq olardıń úlken kemshiligi bar edi: bir neshe aydan soń kislorod hám azıqlıq zatlar jetispewshiliginen olar nabıt bolar edi. Sebebi olarda qan tamırları joq edi.

San-Franciskodaǵı Kaliforniya universiteti ilimpazları kortikal organoidlar átirapında qan tamırları kletkaların ósiriwge eristi.

Vizualizaciya tamırlardıń ishi tap haqıyqıy sıyaqlı boslıqqa iye ekenligin kórsetti.

Jańa tamırlar miydi zıyanlı zatlardan qorǵaytuǵın gematoencefaliyalıq tosıqtı (barer) qáliplestire aldı.

Bul texnologiya keleshekte bas miy keselliklerin emlew hám dári quralların sınaqtan ótkeriwde jańa dáwirdi baslap beriwi múmkin.

Qaraqalpaqstan xabar agentligi