“Adolat” milliy huqıqıy málimleme orayında 2025-2026-jıllarǵa mólsherlengen KSP (Knowledge Sharing Program) bilim almasıw baǵdarlaması sheńberinde elimizge kelgen Koreya Respublikası delegaciyası wákilleri menen keńeytilgen ushırasıw bolıp ótti.
Bul ilaj Ózbekstan hám Qubla Koreya arasındaǵı kóp qırlı birge islesiw baylanıslarınıń logikalıq dawamı sıpatında, huqıqıy tarawdı sanlastırıw hám xalıqtıń huqıqıy mádeniyatın arttırıwda aldınǵı sırt el tájiriybesin engiziw maqsetinde shólkemlestirildi. Ushırasıwda Oraydıń basshıları hám taraw qánigeleri Koreya delegaciyası menen huqıqıy málimleme sistemaların basqarıw hám modernizaciyalaw máselelerin hár tárepleme dodaladı.
Ushırasıwda Koreya tárepi ózleriniń eń aldınǵı qollanbaların, atap aytqanda, jasalma intellektke tiykarlanǵan “Lawbot” sistemasın kórsetti. Bul sistema paydalanıwshılarǵa quramalı huqıqıy máselelerde real waqıt rejiminde onlayn másláhát beriw imkaniyatına iye ekenligi menen áhmiyetli bolıp esaplanadı. Sonday-aq, Koreyada nızam hújjetlerin xalıqqa turmıslıq jaǵdaylar kesiminde, infografikalar járdeminde ápiwayı hám túsinikli tárizde jetkeriwge xızmet etetuǵın “Easy Law” (easylaw.go.kr) platformasınıń jumısı hár tárepleme tallandı. Atap ótilgenindey, Qubla Koreyanıń sanlı húkimet tarawında dúnyada jetekshi statusı bul texnologiyalardıń qanshelli nátiyjeli ekeninen dárek beredi.
Óz gezeginde, “Adolat” orayınıń qánigeleri Ózbekstan Respublikası Nızamshılıq maǵlıwmatları milliy bazası – Lex.uz sistemasınıń sońǵı jıllardaǵı texnikalıq transformaciyası haqqında prezentaciya ótkerdi. Sistemada engizilgen hújjetlerdi audio túrinde tıńlaw, normativlik-huqıqıy hújjetler joybarlarına jámiyetshilik tárepinen usınıslar beriw funkciyaları jáne izlew algoritmleriniń optimallastırılǵanı koreyalı qánigelerde úlken tásir qaldırdı.
Sóylesiw juwmaǵında tárepler Lex.uz sistemasın bunnan bılay da jetilistiriw, onı basqa mámleketlik málimleme sistemaları menen integraciyalaw hám keleshektegi rejelerdi belgilep aldı. Koreyalı qánigeler Ózbekstanda huqıqıy málimleme tarawında ámelge asırılıp atırǵan reformalar hám tarawdaǵı unamlı ózgerislerdi joqarı bahalap, eki mámleket arasındaǵı bul strategiyalıq sheriklik huqıq ústinligin támiyinlew hám xalıqqa sapalı huqıqıy xızmet kórsetiwde jańa basqıshtı baslap beretuǵının atap ótti.
Bunday joybarlar mámleketimizde sanlı huqıqıy ortalıqtı qáliplestiriw hám “Mámleket – insan ushın” principin turmısqa engiziwde áhmiyetli tiykar bolıp xızmet etedi.

ÓzA