Paytaxtımızdaǵı Oraylıq Aziya xalıqaralıq institutında QXR Kommunistlik partiyası Oraylıq komiteti 20-shaqırıq 4-plenumınıń juwmaǵına baǵıshlanǵan brifing hám “Globallıq transformaciya hám mámleketlik basqarıw” temasında Ózbekstan – Qıtay xalıqaralıq ilimiy simpoziumı bolıp ótti.
Ilajlar Qıtay Sociallıq ilimler akademiyası (QSIA) menen birgelikte, eki mámleket arasında sońǵı jıllarda izbe-iz rawajlanıp atırǵan hár tárepleme strategiyalıq sheriklik qatnasıqları sheńberinde shólkemlestirildi.
Dáslep QXR KP OKnıń gezektegi plenumınıń nátiyjelerine baǵıshlanǵan brifingte QSIA prezidenti, QKP Oraylıq Komitetiniń aǵzası Gao Syan CHin úlkesinde júz berip atırǵan unamlı ózgerisler, atap aytqanda, mámleketlik basqarıw sistemasın jetilistiriwge qaratılǵan sociallıq-ekonomikalıq rawajlanıw hám globallıq transformaciya sharayatında mámleketti rawajlandırıw strategiyası haqqında tolıq maǵlıwmat berdi.
Óz gezeginde Oliy Majlis Nızamshılıq palatası Spikeriniń orınbasarı Rahim Hakimov hám “Rawajlanıw strategiyası” orayınıń atqarıwshı direktorı Eldor Tulyakov Ózbekstannıń mámleketlik basqarıwdı modernizaciyalaw tájiriybesi hám elimizde ámelge asırılıp atırǵan strategiyalıq reformalar haqqında pikir bildirdi.
Ánjuman sheńberinde Qıtay Xalıq Respublikası Baslıǵı Si Czinpinniń shıǵarmalarına baǵıshlanǵan arnawlı kórgizbe shólkemlestirildi.
Keyingi ilaj – tórt temadaǵı sessiyadan ibarat “Globallıq transformaciya hám mámleketlik basqarıw” atamasındaǵı Ózbekstan – Qıtay xalıqaralıq ilimiy simpoziumında globallıq ózgerisler sharayatında mámleketlik basqarıw boyınsha tájiriybe almasıw, eki mámleket ekonomikalıq birge islesiwiniń jańa basqıshı, jasalma intellekt hám “Sanlı Jipek jolı” baslaması sheńberinde óz-ara baylanıslılıqtı rawajlandırıw perspektivası, regionallıq birge islesiw, “Oraylıq Aziya – Qıtay” formatı, ShBSh sheńberindegi birge islesiw hám rawajlanıw strategiyaların úylestiriw máseleleri dodalandı.
Atap ótilgenindey, bunday ilimiy-ekspertlik platformalar sheriklikti mazmunı jaǵınan jáne de bayıtıw, mámleketlik basqarıw, ekonomikalıq modernizaciya, sanlı rawajlanıw hám regionallıq turaqlılıq tarawlarında anıq ámeliy sheshimler islep shıǵıwǵa xızmet etedi.

Dilshod Hakimov, Farxod Abdurasulov (suwret), ÓzA