28-fevral – 1 mart kúnleri mámleketimiz paytaxtında bolıp ótetuǵın OTP Group Tashkent Grand Slam 2026 turnirine qızǵın tayarlıq kórip atırǵan dzyudo boyınsha Ózbekstan erler saylandı komandası aǵzaları Yaponiya mámleketinde ótkerilgen 20 kúnlik oqıw-shınıǵıwlarına qatnastı.
Saylandı komandamız bas treneri Aleksey Budolin basshılıǵındaǵı dzyudoshılarımız belgilengen reje tiykarında 11-18-yanvar kúnleri Kokushikan, 18-24-yanvarda Tokai, 24-29-yanvar kúnleri aralıǵında bolsa, Nixon Universiteti qasındaǵı dzyudo orayında shuǵıllandı.
Ótkerilgen bul xalıqaralıq jıyın sheńberinde komandamız aǵzaları Yaponiya hám Túrkiya saylandı komandaları menen birgelikte shınıǵıwlarǵa qatnastı.
Áhmiyetli tárepi sonda, bul oqıw-shınıǵıwlarda qaraqalpaqstanlı jas palwan Ernazar Sarsenbaev ta qatnasıp, óziniń sheberligin arttırıp qayttı.
– Oqıw shınıǵıwına mámleketimiz saylandı komandasınan -60 kg salmaqta Bahrom Boturov, Samariddin Qwchqorov, -66 kg da Zamohshari Bekmurodov, Abdurahim Nutfulloev, -73 kg da Shahram Ahadov, -81 kg da Arslon Tojiev, -90 kg da Davlat Bobonov, Shahzodxwja Sharipov, Umar Bozorov, -100 kg da men hám +100 kg da Alisher Yusupovlar qatnastı. Onda bizler ustazlarımızdan, yaponiyalı hám túrkiyalı kúshli palwanlardıń tatamige shıǵıwlarınan úlken tájiriybe aldıq. Bul álbette, bizlerge oǵada paydalı boldı, – deydi Ernazar Sarsenbaev.
Saylandı komandamız aǵzaları búgin elimizge jetip keledi.

Adilbay Orazov,
Qaraqalpaqstan xabar agentligi sholıwshısı