Berdaq atındaǵı Qaraqalpaq mámleketlik universitetiniń yuridika fakultetinde student-jaslardıń huqıqıy sanasın hám kásiplik kónlikpelerin arttırıw maqsetinde sudyalar qatnasıwında ushırasıw shólkemlestirildi.
Ushırasıwǵa Nókis rayonlar aralıq ekonomikalıq sudınıń baslıǵı Q.Xojamuratov, sudyalar B.Baymuratov, B.Bekmuratov hám fakultettiń oqıw isleri boyınsha dekan orınbasarı A.Reyimbaevlar qatnastı.
Sudyalar óz bayanatlarında sudyanıń biyǵárezligi, qalıslıǵı hám hadallıǵı ádil sudlawdıń áhmiyetli principleri ekenin atap ótip, sudya kásibine qoyılatuǵın joqarı ádep-ikramlılıq hám huqıqıy talaplar haqqında aytıp berdi.
Ilaj dawamında korrupciyaǵa qarsı gúresiw, sud sistemasındaǵı reformalar hám nızam ústinligin támiyinlew máseleleri hár tárepleme dodalandı. Atap aytqanda, sońǵı jılları mámleketimizde korrupciyaǵa qarsı gúresiw baǵdarında qabıl etilgen nızamlar, Prezidentimizdiń párman hám qararları, mámleketlik baǵdarlamalardıń áhmiyeti boyınsha tolıq túsinikler berildi. Atap ótilgenindey, “Korrupciyaǵa qarsı gúresiw haqqında”ǵı nızam jáne “Mámleketlik puqaralıq xızmeti haqqında”ǵı nızam mámleketlik uyımlardıń jumısında ashıq-aydınlıq hám esap beriwdi támiyinlewdiń huqıqıy tiykarı bolıp xızmet etpekte.
Sonıń menen birge, mámleketimiz Prezidentiniń 2025-jıl 26-dekabr kúni Parlament hám Ózbekstan xalqına jollaǵan Múrájatında korrupciyaǵa qarsı gúresiw máselesine ayrıqsha itibar qaratılǵanı atap ótildi. Múrájatta korrupciya reformalarǵa qıyanet ekeni, 2026-jılı bul illetke qarsı gúresiw boyınsha ayrıqsha ilajlar kóriliwi belgilengenine toqtap ótildi.
Sonıń ishinde, barlıq mámleketlik uyım hám shólkemlerde komplaens hám korrupciyaǵa qarsı ishki qadaǵalaw ushın juwapker basshınıń orınbasarı lawazımın engiziw, byudjet qarjılarınan paydalanıwda jeke juwapkershilikti kúsheytiw, iyelep turǵan ornı hám lawazımına qaramastan, nızam aldında hámmeniń teńligi principin qatań támiyinlew wazıypaları belgilep berilgeni atap ótildi. Korrupciyaǵa qarsı gúresiwde hesh bir uyım yamasa lawazımlı shaxs qadaǵalawdan shette qalmaydı, komplaens xızmetiniń jumısına tosqınlıq etiw bolsa korrupciyaǵa sheriklik sıpatında bahalanadı. Bul qatnas jámiyetshilikte korrupciyaǵa mawasasız múnásibetti qáliplestiriw hám nızam ústinligin bekkemlewde ayrıqsha áhmiyetke iye.
Ushırasıw juwmaǵında student-jaslar tárepinen berilgen sorawlarǵa sudyalar juwap berip, yurist kásibiniń juwapkershiligi, sud sistemasında jumıs alıp barıw talapları hám kásiplik hadallıqtıń áhmiyeti boyınsha óz pikirlerin bildirdi.
Álbette, ótkerilgen bunday ushırasıwlar jaslardıń huqıqıy sanasın arttırıw, olardı korrupciyaǵa qarsı mawasasız ruwxta tárbiyalawǵa xızmet etedi.

Adilbay Orazov,
Qaraqalpaqstan xabar agentligi sholıwshısı