Qaraqalpaqstan Respublikası Qurılıs hám turaq jay kommunal xojalıǵı ministrliginde baspasóz konferenciyası bolıp ótti.
Baspasóz konferenciyasında ministrliktiń bas qánigesi Azat Orazbaev, Kóp kvartiralı jaylardı basqarıw sistemasın rawajlandırıw hám renovaciya joybarların ámelge asırıw bóliminiń baslıǵı Ruslan Qaljanbaevlar tárepinen 2025-jıl dawamında ámelge asırılǵan qurılıs jumısları, paydalanıwǵa tapsırılǵan hám házirgi waqıtta qurılısı dawam etip atırǵan obektler, 2025-2026-jılǵı gúzgi-qısqı máwsimde sociallıq taraw obektleri, ekonomika tarmaqları hám kóp qabatlı turaq jaylardıń turaqlı islewin támiyinlew boyınsha ámelge asırılıp atırǵan ilajlar tuwralı keń túrde maǵlıwmat berildi.
Sonday-aq, kommunallıq xojalıq tarawında alıp barılıp atırǵan jumıslar, kóp qabatlı turaq jaylarǵa xızmet kórsetiwdiń sapası, infrastrukturanı jaqsılaw, xalıqqa qolaylı hám úzliksiz kommunallıq xızmet kórsetiwdi támiyinlew baǵdarındaǵı rejelerge de hár tárepleme toqtap ótilip, bayanatlar dawamında infografika hám videomateriallar kórsetilip, taraw boyınsha statistikalıq maǵlıwmatlar ashıq hám túsinikli tárizde usınıldı.
Atap ótilgenindey, 2025-2026-jılǵı gúzgi-qısqı máwsimde sociallıq taraw obektleri, ekonomika tarmaqları hám kóp qabatlı turaq jaylardıń turaqlı islewin támiyinlew mámleketimiz ushın áhmiyetli wazıypalardan biri boldı. Xalıqqa qolaylı jasaw sharayatın jaratıw, energiya resurslarınan aqılǵa uǵras paydalanıw hám bar infrastrukturanı nátiyjeli basqarıw maqsetinde bir qatar ilajlar ámelge asırılmaqta.
– Respublikamızda jámi 1729 kóp kvartiralı turaq jay bar. Sonnan, 1400 turaq jay 26 basqarıw shólkemi hám 26 turaq jay úsh turaq jay iyeleri sherikligi tárepinen basqarılmaqta, Al, 79 turaq jay basqa mákemelerdiń balansında bolsa, 224 turaq jay ózin-ózi basqarıw usılın tańlaǵan, – deydi R.Qaljanbaev.
Qaraqalpaqstan Respublikası Joqarǵı Keńesi Prezidiumınıń tiyisli qararları menen 11 sociallıq turaq jaydıń aǵımdaǵı ońlanıwı, kóp qabatlı turaq jaylardan 15 turaq jayda sırtqı kórinisin jaqsılaw hám 252 turaq jayda iri hám aǵımdaǵı ońlaw jumısları ámelge asırıldı.
Respublikamız aymaǵındaǵı kóp kvartiralı turaq jaylardı basqarıwda, zamanagóy málimleme-kommunikaciya texnologiyaların engiziw, kóp kvartiralı turaq jaylardı saqlaw menen baylanıslı bolǵan qárejetler boyınsha esap-sanaq jumısların júrgiziwde ashıq-aydınlıqtı támiyinlew jáne xalıqqa jáne de qolaylı sharayatlar jaratıw maqsetinde, billing sisteması – “Mening uyim” elektron programması engizilgen. Usı sistema arqalı kóp kvartiralı turaq jaylardıń basqarıw uyımları arqalı májbúriy tólemleri óndirilmekte.
Baspasóz konferenciyası dawamında qatnasıwshılar turaq jaylardıń jılıtıw sisteması, kanalizaciyası, bahası, turaq jaylardı qurıwda qollanılıp atırǵan zamanagóy texnologiyalar hám basqa da máseleler boyınsha ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi