Aldın xabar berilgenindey, bajıxana uyımlarında hár piyshembi kúni huqıqbuzarlıqlarǵa qarsı profilaktikalıq ilajlar shólkemlestiriledi.
“Qaraqalpaqstan” temir jol shegara bajıxana postı xızmetkerleri tárepinen Qońırat rayonındaǵı «Qaraqalpaqstan» APJ baslıǵı, profilaktika inspektorı hám awıl turǵınlarınıń qatnasıwında “Korrupciyaǵa qarsı gúresiw” atamasında gezektegi ushırasıw ótkerildi.
Ushırasıwda puqaralarǵa bajıxana shegaraların kesip ótiwdiń tártip-qaǵıydaları, tovarlardı bajısız alıp kiriw hám alıp shıǵıw normaları túsindirilip, nızamshılıqta belgilengen tártip-qaǵıydalarǵa qatań ámel etiliwi, qadaǵan etilgen tovarlardı nızamsız túrde alıp ótiwge urınbaw kerek ekenligi eskertildi. Sonday-aq, korrupciyanıń aldın alıw hám oǵan qarsı gúresiw sistemasın bunnan bılay da jetilistiriw ilajları boyınsha qabıl etilgen párman, qarar hám normativlik-huqıqıy hújjetler haqqında maǵlıwmatlar berildi.
Puqaralarǵa bajıxana xızmetkerleriniń lawazım wákilliginen materiallıq yamasa materiallıq emes máp esesine paydalanıw, dámegóylik jaǵdaylarına dus kelse, Bajıxana komitetiniń 11-08 hám Qaraqalpaqstan Respublikası Bajıxana basqarmasınıń 61-224-90-86 isenim telefonına qońıraw etiwi soraldı.
Bul baǵdardaǵı úgit-násiyatlaw jumısları jolawshı poezdlarında bajıxana shegaraların kesip ótip atırǵan puqaralarǵa da túsinik beriw arqalı dawam etpekte.

Qaraqalpaqstan xabar agentligi