Sholıw

“Ózbekstan – 2030” strategiyası joybarı derlik bir ay dawamında keń jámiyetshiliktiń dodalawınan ótkerildi. Bul strategiyalıq hújjetti jetilistiriw baǵdarında keńnen úgit-násiyatlaw jumısları ámelge asırıldı. 28-yanvar kúnine shekem dawam etken jámiyetshilik dodalawlarında úsh yarım mıńnan aslam usınıslar, pikirler kelip túsken.
“Ózbekstan – 2030” strategiyasınıń jańa redakciyadaǵı joybarında barlıq tarmaqlar qatarında jaslar siyasatı baǵdarında da bir qatar maqsetli kórsetkishler názerde tutılǵan.
Sonıń ishinde, xalıqaralıq imtixan sistemaları boyınsha joqarı ball (dáreje) toplaǵan 86 mıń jasqa imtixan tapsırıw qárejetlerin tolıq qaplap beriw rejelestirilgen. Sonday-aq, shet tillerin úyreniwdi qollap-quwatlawǵa qaratılǵan 2+6 baǵdarlaması arqalı 100 mıń jastı tartıw názerde tutılǵan.
Bizge belgili, “Ibrat farzandlari” joybarı jaslardıń til úyreniwi ushın eń qolaylı onlayn platformaǵa aylanıp barmaqta. Strategiyada bul joybardı jáne de ǵalaba en jaydırıw hám 3 million jastıń shet tillerin biypul (onlayn) úyreniwin shólkemlestiriw maqseti belgilengen.
Sonday-aq, 350 mıń jastıń intellektuallıq potencialın arttırıw, 400 mıń jastıń bántligin támiyinlew hám mashqalaların sheshiwge erisiw, IT tarawında 300 mıń jastı jumıs penen támiyinlew jumısları názerde tutılıp atırǵanı itibarǵa ılayıq.
Jaslardı kitapqumarlıqqa tartıw maqsetinde “Mutoala” baǵdarlaması islep shıǵılıp, bul onlayn platformaǵa kitaplardıń elektron, audio formatları jaylastırılǵan. Endi baǵdarlamanı jáne de keńnen ǵalaba en jaydırıw hám 2030-jılǵa shekemgi múddette 4,2 million jastı usı joybarǵa qamtıp alıp, kitapqumarlıqtı keńeytiw maqset etilgen. Bul bolsa jaslar ushın elektron túrdegi kitapqumarlıq platformasın usınıw arqalı olardı kitap oqıw menen bánt etiwin támiyinlewge xızmet etedi.
Ulıwma, bul strategiyada jaslar siyasatına baylanıslı názerde tutılǵan maqsetli kórsetkishler elimiz jasların zaman talabına múnásip, intellektuallıq potencialı joqarı kadr etip tayarlawǵa, olardı hár tárepleme qollap-quwatlawǵa, jumıs penen bántligine tiykar boladı.

Muhtarama Komilova,
ÓzA