“Avtomatlastırılǵan transport tólem sisteması operatorı” AJ baspasóz xızmetiniń xabar beriwinshe, 2025-jıl dawamında jámiyetlik transportta ámelge asırılǵan tólem operaciyalarınıń sanı sezilerli dárejede arttı. Jıl juwmaǵında ulıwma tranzakciyalar kólemi 692 milliondı qurap, bul kórsetkish 2024-jılǵa salıstırǵanda 35,7 procentke joqarı boldı.
Tólem usılları kesiminde eń úlken úles bank kartalarınıń úlesine tuwra keldi. Atap aytqanda, jámiyetlik transportta bank kartaları arqalı ámelge asırılǵan tólemlerdiń sanı 387,4 millionǵa jetti. Bul ótken jılǵı kórsetkishten 165 procentke kóp bolıp, xalıqtıń naq pulsız tólem qurallarına bolǵan isenimi barǵan sayın artıp atırǵanın kórsetedi.
Sonıń menen birge, transport kartaları arqalı ámelge asırılǵan tranzakciyalar da turaqlı ósiwdi kórsetti. 2025-jılı usı usıl arqalı 213 million tólem ámelge asırılǵan bolıp, bul 2024-jılǵa salıstırǵanda 52 procentke ósiwdi quraǵan.
Innovaciyalıq tólem xızmetleri de jámiyetlik transportta óz ornın tappaqta. Atap aytqanda, ótken jıldan engizilgen FacePay (júzdi tanıp tólew) xızmeti arqalı 1 million 89,7 mıń márte tólem ámelge asırılǵan. Sonday-aq, PalmPay — alaqan arqalı tólew xızmeti arqalı 112 mıń tranzakciya dizimge alındı. Bul kórsetkishler sanlı texnologiyalardıń jámiyetlik transport sistemasına basqıshpa-basqısh engizilip atırǵanın tastıyıqlaydı.
Qánigelerdiń pikirinshe, bul tendenciya saqlanıp qalsa, keleshekte metropolitende tólemler tolıq naq pulsız túrge ótiw itimalı joqarı. Usı jılı metro ushın QR-biletler arqalı ámelge asırılǵan operaciyalar sanı 22,6 millionǵa teń bolıp, bul ótken jılǵa salıstırǵanda 3,3 esege azayıwı menen túsindiriledi. Bul bolsa QR-biletlerdiń ornın bank kartaları hám biometrikalıq tólem usılları basıp baratırǵanın kórsetedi.

Sh.Mamaturopova, ÓzA