Búgingi globallasıw sharayatında shet tillerin biliw jaslar ushın keń imkaniyatlar esigin ashpaqta. Bilim alıw, kásiplik rawajlanıw hám xalıqaralıq maydanda básekige shıdamlı bolıwda shet tili áhmiyetli orın iyeleydi.
Sonlıqtan elimizde bilimlendiriw sistemasında shet tillerin úyreniwdi qollap-quwatlawǵa qaratılǵan jańa jeńillikler engizilmekte.
Nızamshılıqqa ayırım ózgerisler hám qosımshalar kirgizildi. Oǵan bola, pánler kompleksinde shet tili 1-pán sıpatında belgilengen tálim baǵdarlarına qabıllaw shet tilin biliw boyınsha keminde V1 dárejedegi milliy yamasa xalıqaralıq tán alınǵan sertifikat tiykarında ámelge asırıladı.
Sonday-aq, pánler kompleksinde shet tili páni bar bolǵan tálim baǵdarlarına qabıllaw procesinde ayrıqsha tártip belgilendi.
Atap aytqanda, V1 dárejedegi milliy yamasa xalıqaralıq tán alınǵan sertifikatqa iye abiturientlerge usı pánnen belgilengen maksimal balldıń 75 procenti muǵdarında ball beriledi. Bunnan tısqarı V2 hám onnan joqarı dárejedegi milliy yamasa xalıqaralıq tán alınǵan sertifikatqa iye abiturientlerge bolsa usı pánnen belgilengen maksimal ball tolıq esaplanadı.
Burın pánler kompleksinde shet tili birinshi pán sıpatında belgilengen tálim baǵdarlarına qabıllaw ushın keminde V2 dárejedegi sertifikat talap etiletuǵın edi. Jańa tártip bolsa V1 dárejedegi abiturientlerge de qosımsha imkaniyat jaratıp, jaslardı shet tillerin úyreniwge jáne de keńnen tartıwǵa xızmet etedi.

Muhayyo Toshqoraeva, ÓzA