Házirgi waqıtta Ózbekstan Respublikası Prezidentiniń Oliy Majliske hám Ózbekstan xalqına jollaǵan Múrájatın jáne “Ózbekstan-2030” strategiyasında belgilep berilgen áhmiyetli wazıypalardıń mazmun-mánisin xalıqqa, ásirese, jaslardıń sanasına sińdiriw, sonday-aq, toy hám máresimlerde artıqsha ısırapgershilik jaǵdaylarınıń aldın alıw maqsetinde Shımbay rayonında da keń kólemli úgit-násiyatlaw ilajları ámelge asırılmaqta.
Shımbay rayonı hákiminiń orınbasarı, Ruwxıylıq hám aǵartıwshılıq Keńesi baslıǵınıń orınbasarı A.Utemisov tárepinen jumıs rejesine muwapıq, rayondaǵı Gújimli, Abat mákan hám Doslıq mákan puqaralar jıyınlarındaǵı 43, 37 hám 36-sanlı ulıwma bilim beriw mekteplerinde xalıqtıń hám oqıwshı-jaslardıń qatnasıwında keń kólemli ruwxıy-aǵartıwshılıq ilajları ótkerildi.
Ilajlarǵa Shımbay rayonı hákiminiń orınbasarı, Shańaraq hám hayal-qızlar bóliminiń baslıǵı G.Mambetniyazova, “Nuraniy” qorı rayonlıq bóliminiń baslıǵı Ó.Tolıbekov, Respublikalıq Ruwxıy-aǵartıwshılıq orayı rayonlıq bóliminiń baslıǵı Q.Mambetkarimov, Din isleri boyınsha komitettiń rayonlıq bas qánigesi M.Berdimuratov hám Shımbay rayonı “Xan” meshitiniń imam-xatibi I.Qazaqbaevlar qatnastı.
Ilaj dawamında shıǵıp sóylegen juwapkerler Ózbekstan Respublikası Prezidentiniń Múrájatında belgilengen sociallıq-ekonomikalıq reformalar, ruwxıy-aǵartıwshılıq tarawdaǵı tiykarǵı wazıypalar hám olardıń jámiyetlik turmısta tutqan ornı haqqında hár tárepleme maǵlıwmat berdi. Atap aytqanda, jámiyette salamat turmıs tárizin qáliplestiriw, shańaraq institutın bekkemlew, jaslar tárbiyasında únemlilik, ápiwayılıq hám juwapkershilik sıyaqlı áhmiyetli túsiniklerdi qáliplestiriw máselelerine ayrıqsha itibar qaratıldı.
Sonday-aq, “Íqshamlıq” joybarı sheńberinde ayırım toy hám máresimlerde ushırasıp atırǵan artıqsha dábdebe, ısırapgershilik hám tiykarsız qárejetlerdiń sociallıq hám ekonomikalıq unamsız aqıbetleri haqqında keń túrde túsinikler berildi. Bunday jaǵdaylar xalqımızdıń ázeliy milliy qádiriyatları, úrp-ádetleri hám ruwxıy ólshemlerine pútkilley qayshı keletuǵını, máresimlerdi ıqsham, tártipli hám norma sheńberinde ótkeriw jámiyettiń turaqlılıǵı hám shańaraqlardıń abadanlıǵı ushın úlken áhmiyetke iye ekeni atap ótildi.
Ilaj dawamında búgingi kúnde ayırım toy-máresimlerde artıqsha dábdebe hám ısırapkershilikke jol qoyılıp atırǵanlıǵı, bunday jaǵdaylar xalqımızdıń milliy qádiriyatlarına sáykes kelmeytuǵınlıǵı atap ótildi.
Qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi