Ózbekstan Amerika bazarında mámlekettiń bay turizm potencialın úgit-násiyatlaw maqsetinde “Ózbekstan – Jipek jolı dúrdanası” súreni astında bir qatar road-shou ilajların ótkerdi. Bul prezentaciyalar AQShtıń iri megapolisleri – Nyu-York hám CHikago qalalarında shólkemlestirildi.
Road-shoudıń birinshi basqıshı 2026-jıl 24-yanvar kúni Nyu-York qalasında AQShtaǵı eń abıraylı turistlik kórgizbelerden biri esaplanǵan “Travel & Adventure Show-2026” sheńberinde bolıp ótti.
Ilaj qatnasıwshılarına Ózbekstannıń áyyemgi tariyxı, bay mádeniy miyrası, túrli turizm baǵdarları jáne mámlekettiń tákirarlanbas tábiyǵıy hám arxitekturalıq estelikleri haqqında tolıq maǵlıwmat berildi.
Prezentaciya kompaniyasınıń ekinshi basqıshı 2026-jıl 27-yanvar kúni CHikago qalasında ótkerildi. Onda turizm tarawınıń qánigeleri, turoperatorlar hám ǵalaba xabar qurallarınıń wákilleri Ózbekstannıń tariyxıy-mádeniy baylıqları, siyrek ushırasatuǵın turistlik marshrutları hám zamanagóy turizm infrastrukturası menen jaqınnan tanıstı.
Atap ótiliwinshe, AQShtıń jetekshi qalalarında ótkerilgen bul road-shou ilajları Ózbekstandı Ullı Jipek jolındaǵı áhmiyetli turistlik oraylardan biri sıpatında xalıqaralıq kólemde úgit-násiyatlawǵa xızmet etedi. Sonday-aq, ilajlar sırt elli birge islesiwshiler hám turistler arasında mámleketke bolǵan qızıǵıwshılıqtı jáne de arttırıwda úlken áhmiyetke iye bolmaqta.

Muhayyo Toshqoraeva, ÓzA