Rawajlanıwdıń birden-bir hám ózgermeytuǵın qaǵıydası tınımsız miynet hám tájiriybeden ibarat. Barlıq tarawlar qatarında elimizdiń joqarı bilimlendiriw sisteması da áne usınday joldı basıp ótpekte. Xalıqaralıq birge islesiwler arqalı alternativ sistema jaratıwdı gózlegen taraw wákilleri maqsetke alǵa umtılmaqta. Quwanıshlı tárepi sonda, tili, mádeniyatı bizge jaqın bolǵan milletler menen de baylanıslar doslıq túrge enbekte.
Atap aytqanda, Ózbekstan hám Túrkiya arasında joqarı bilimlendiriw tarawındaǵı birge islesiwdi jáne de bekkemlew maqsetinde Ankara qalasında Ózbekstan Respublikası joqarı bilimlendiriw, ilim hám innovaciyalar ministri Qońıratbay Sharipov hám Túrkiya Respublikası Joqarı bilimlendiriw keńesiniń baslıǵı Erol Wzvar ushırasıw ótkerdi.
Ushırasıwda tárepler Ózbekstan – Túrkiya qatnasıqları keyingi jılları keń kólemli strategiyalıq sheriklik dárejesine kóterilgenin, sonıń ishinde, joqarı bilimlendiriw, ilim hám innovaciyalar tarawlarındaǵı birge islesiw izbe-iz rawajlanıp atırǵanın ayrıqsha atap ótti.
Sonday-aq, Ózbekstan Respublikası Prezidenti Shavkat Mirziyoev Túrkiya Respublikası Prezidenti Rejep Tayyip Erdoǵannıń mirát etiwine bola Túrkiya Respublikasına ámelge asıratuǵın rásmiy saparı eki tárepleme birge islesiwdi, sonıń ishinde, joqarı bilimlendiriw, ilim hám innovaciyalar tarawlarındaǵı baylanıslardı jańa basqıshqa alıp shıǵıwda úlken áhmiyetke iye ekeni ayrıqsha atap ótildi.
Álbette, bilimlendiriw sistemasın rawajlandırıwdı jańa basqıshqa kóteriw boyınsha mámleketimiz basshısı alǵa qoyıp atırǵan baslamalar bunday birge islesiwlerde óz kórinisin tabadı.

Sherbek Islomov, ÓzA