Jáhán densawlıqtı saqlaw shólkeminiń qánigeleri “Nipah” hám COVID-19 virusın salıstırmalı úyrenip, tómendegi juwmaqqa keldi: “Nipah” virusı jańa COVID-19 emes. Bul ilimpazlarǵa belgili.

Yanvar ayınıń ortalarında Hindstannıń shıǵısındaǵı Batıs Bengaliya shtatı rásmiyleri eki medicina xızmetkeri “Nipah” virusın juqtırǵanı haqqında xabar bergen edi. Házirgi waqıtta ózleri jumıs isleytuǵın Barasat emlewxanasında emlenip atırǵan bul nawqaslar ventilyaciyaǵa jalǵanǵan izolyaciya bólimine jatqarılǵan.

Batıs ǵalaba xabar quralları keselleniw jaǵdayınıń kóbeygeni haqqındaǵı gáp-sózlerge qaramastan, Hindstan húkimeti jańa virus shıqqanın ele tastıyıqlamadı.

JDSSh bolsa “Bul sońǵı jigirma jıl ishinde Qubla hám Qubla-Shıǵıs Aziyada sporadikalıq epidemiyaǵa sebep bolǵan belgili zoonoz virus”, dep qosımsha etken. Dúzilme epidemiologiyalıq qadaǵalaw, qáwipti bahalaw hám juwap ilajların qollap-quwatlaw maqsetinde mámlekettiń densawlıqtı saqlaw uyımları menen tıǵız birge islesiwdi dawam ettirmekte.

Shólkem ekspertleriniń bahalawına bola, “Nipah” dúnyadaǵı “eń qáwipli virus” eken. Bul kesellikti emlew yamasa bul virusqa qarsı shanshıwdıń ilajı joq. “Nipah” temperatura hám encefalopatiyaǵa sebep boladı. Yaǵnıy, miy kletkaların zıyanlap, 40-75 procent jaǵdayda ólimge alıp keledi.

Bul virus janzatlar, kóbinese tıshqan arqalı tarqaladı, ádette awırǵan haywannıń silekeyi arqalı juǵadı. Úy haywanlarına da ótiwi múmkin.

“Nipah” hawaǵa derlik tarqalmaydı. Demek, hawa arqalı emes, al tek ǵana infekciyalanǵan insan denesindegi suyıqlıq arqalı juǵadı.

G.Sattorova, ÓzA