Berdaq atındaǵı Qaraqalpaq mámleketlik universitetiniń yuridika fakulteti professor-oqıtıwshıları hám studentleri menen sudyalar qatnasıwında ushırasıw ótkerildi. Ilajda sud sistemasın sanlastırıw, korrupciyaǵa qarsı gúresiw hám Ózbekstan Respublikası Joqarǵı sudı Plenumı qararlarınıń áhmiyeti jaslarǵa túsindirildi.
Ushırasıwda Qaraqalpaqstan Respublikası Hákimshilik sudınıń sudyası A.Imatov sud sistemasında korrupciyanıń aldın alıw, mámleketlik xızmetlerdi sanlastırıw hám jasalma intellekt texnologiyaların engiziw boyınsha ámelge asırılıp atırǵan reformalar haqqında maǵlıwmat berdi. Atap ótilgenindey, sud processleriniń elektronlasıwı ashıq-aydınlıqtı arttırıp, insan faktorın azaytıwǵa xızmet etedi.
Sonday-aq, ótkerilgen ilajda Nókis rayonlararalıq hákimshilik sudınıń sudyası Q.Babanazarov 2025-jıl 24-noyabrde qabıl etilgen Ózbekstan Respublikası Joqarǵı sudı Plenumınıń 23-sanlı qararınıń áhmiyeti boyınsha keń túsinik berip, bul qarardıń sud ámeliyatındaǵı birden-bir qatnastı támiyinlewge qaratılǵanın atap ótti. Sonıń menen birge, sudyalar óz bayanatlarında sud jumısların sanlastırıw arqalı puqaralardıń sudlarǵa múrájat etiwin ápiwayılastıratuǵının, aralıqtan qatnasıw, elektron arza beriw hám sud hújjetlerin onlayn alıw imkaniyatların jáne de keńeytetuǵının atap ótti. Bul óz gezeginde ádil sudlawǵa erisiw dárejesin arttırıwǵa xızmet etedi.
Ilaj sońında studentler ózlerin qızıqtırǵan sorawlarǵa juwap alıp, sud sistemasında ámelge asırılıp atırǵan reformalar boyınsha óz-ara pikirlesti.

Adilbay Orazov,
Qaraqalpaqstan xabar agentligi sholıwshısı.