Ózbekstan Respublikası Prezidenti Shavkat Mirziyoevtiń 2025-jıl 26-dekabr kúni usınılǵan Oliy Majlis hám Ózbekstan xalqına Múrájatında “Korrupciya – mámleket rawajlanıwına tosqınlıq etetuǵın, ádillik hám nızam ústinligin izden shıǵaratuǵın, jámiyette isenim ortalıǵın hálsiretetuǵın eń awır qáwip ekenligi, Korrupciyaǵa jol qoyıw bolsa reformalarımızǵa qıyanet bolıp tabıladı”-dep Prezidentimiz bul illetke qarsı gúresiw boyınsha 2026-jılı “ayrıqsha jaǵday” járiyaladı.
Barlıq uyımlarda komplaens hám korrupciyaǵa qarsı ishki qadaǵalawǵa juwapker orınbasar lawazımı engizildi. Esap palatasınıń wákili jumısın jolǵa qoyıw tapsırması berildi.
Bul basshılar – sistemadaǵı hadal emes shaxslardı anıqlaw, sonday-aq, byudjet qarjılarınıń talan-taraj etiliwi hám lawazımınan paydalanıw jaǵdaylarınıń aldın alıw boyınsha tásirsheń qadaǵalaw ornatadı hám Prezident aldında esap beretuǵının atap ótti.
Nızam aldında hámme teń! Qáwipsizlik xızmeti, ishki isler, prokuratura, salıq, bajıxana, qarjı, bank, iri mámleketlik kompaniyalar, ministrlikler hám hákimlikler, bir sóz benen aytqanda, birde-bir uyım hám shólkem qadaǵalaw astında bolıwın atap ótti.
Altınshı tiykarǵı baǵdar – zamanagóy mámleketlik basqarıw hám ádil sud-huqıq sisteması baǵdarındaǵı reformalar dawam ettiriledi.
Bárinen burın, 2026-jıldan baslap Elektron húkimet platforması túp-tiykarınan jańalanadı.
Endi barlıq mámleketlik uyımlardıń 1 mıńnan aslam mámleketlik xızmetleri, 5 mıńnan aslam funkciya hám wazıypaları, 240 maǵlıwmatlar bazası hám málimleme sisteması, 100 mıńnan aslam mámleketlik xızmetkerdiń máhálle, rayon, wálayat, respublika dárejesindegi wákillikleri Birden-bir sanlı platformaǵa integraciyalanadı.
Platformaǵa kelip túsken múrájatlar, olardı orınlawshılarǵa bólistiriw hám kórip shıǵıw múddetin qadaǵalaw jasalma intellekt arqalı ámelge asırıladı.
“Eń áhmiyetlisi, mámleketlik xızmetlerdi kórsetiwde insan faktorısız, korrupciya hám artıqsha byurokratiyadan jıraq ekosistema jaratamız. Mámleketlik xızmetlerdi proaktiv hám jıynalmalı túrde kórsetiw sistemasın rawajlandıramız,” – dedi mámleketimiz basshısı.
Puqaralarımızdan bajıxana nızamshılıǵına qatań ámel etiwin, para usınıs etpew hám dámegóylik yamasa lawazım wákilliginen paydalanıw jaǵdaylarına dus kelgende Mámleketlik bajıxana komitetiniń 11-08 hám Qaraqalpaqstan Respublikası bajıxana basqarmasınıń 61-224-90-86 isenim telefonlarına múrájat etiwi múmkin ekenligin bildiremiz.

Qaraqalpaqstan xabar agentligi

“Nókis Aeroportı” shegara bajıxana postınıń inspektorı Ya.Zilyaeva