Neft-gaz tarawında ámelge asırılıp atırǵan reformalardıń nátiyjeliligi, bárinen burın, qabıl etilgen qararlar hám belgilengen wazıypalardıń óz waqtında hám tolıq orınlanıwına tikkeley baylanıslı. Strategiyalıq áhmiyetke iye bul tarmaqta óndiristiń turaqlılıǵın támiyinlew, resurslardan aqılǵa uǵras paydalanıw hám basqarıw sistemasın jetilistiriw atqarıw tártibin bekkemlewdi talap etpekte.
Sonlıqtan, tarawda alıp barılıp atırǵan hár bir reformanıń ámeldegi nátiyjesi basshılar hám juwapker xızmetkerlerdiń juwapkershiligi jáne orınlawǵa bolǵan qatnası menen belgilenedi.
“Ózbekneftgaz” AJ basqarması baslıǵı Abdugani Sanginovtıń qatnasıwında ótkerilgen gezektegi májiliste jámiyettiń jumısındaǵı usınday tiykarǵı baǵdarlar, berilgen tapsırmalardıń orınlanıwı hám jumıs tártibin támiyinlew máseleleri hár tárepleme dodalandı. Májilis dawamında “áhmiyetli 100 kúnlik” sheńberinde usı kúnge shekem ámelge asırılǵan jumıslar hám bar kemshilikler hár tárepleme tallandı.
Atap ótilgenindey, usı dáwir ishinde jámiyette geologiya-izlew jumısların jedellestiriw, gaz qazıp shıǵarıw kólemlerin arttırıw, neft-gaz ónimlerin islep shıǵarıw kórsetkishlerin támiyinlew, finanslıq salamatlandırıw, kredit júgin azaytıw hám sanlastırıw boyınsha keń kólemli reformalar baslandı.
Sonıń menen birge, tapsırmalardıń orınlanıwı orınlarda óz kórinisin berip atırǵanı atap ótilip, wazıypalardıń ayırım bántlerin orınlawda júzege kelip atırǵan tosqınlıqlardı saplastırıw boyınsha anıq sheshimler ortaǵa taslandı. Atap aytqanda, gaz qazıp shıǵarıwdı arttırıw, qudıqlardı burawlaw hám kapital ońlaw jumısların jedellestiriw, zamanagóy texnologiyalardı tartıw, sırt elli sherikler menen sóylesiwlerdi nátiyjeli shólkemlestiriw, burawlaw ushın zárúr materiallıq-texnikalıq resurslar támiynatın qatań qadaǵalawǵa alıw boyınsha qosımsha tapsırmalar berildi.
Jámiyet málimleme xızmetiniń xabarına bola, májilis juwmaǵında basqarma baslıǵı atqarıw tártibin támiyinlew barlıq basshılar ushın tiykarǵı wazıypa ekenin ayrıqsha atap ótip, barlıq tapsırmalardıń orınlanıwın kúnlik qadaǵalawǵa alıw hám nátiyjeler boyınsha ay juwmaǵında esabat beriw wazıypasın belgilep berdi. Atqarıw tártibin buzǵan juwapkerlerge qatań sharalar kóriliwi belgilendi.
“Áhmiyetli 100 kúnlik” nátiyjeleri neft-gaz tarawındaǵı reformalar tek ǵana atqarıw tártibi hám juwapkershilikli qatnas jasaw arqalı nátiyje beretuǵının kórsetti. Turaqlı óndiristi támiyinlew, zamanagóy texnologiyalardı engiziw hám wazıypalardı qatań qadaǵalaw tarawdaǵı hár bir basshı hám xızmetker ushın tiykarǵı wazıypa bolıp qalmaqta.

N.Ziyodullaeva, ÓzA