Búgingi kúnde “DMO Karakalpakstan” (Destination Management Organization of Karakalpakstan – turistlik baǵdardı basqarıwshı shólkem) jámiyetlik birlespesi tárepinen aymaqtıń turizm tarawın rawajlandırıw baǵdarında bir qatar joybarlar ámelge asırılmaqta. Nókis qalasında usı shólkemniń “Jámiyetlik awqatlanıw orınlarında gigiena hám sapanı basqarıw” atamasındaǵı gezektegi seminar-treningi bolıp ótti.

Ilaj “QR Gastronomic Quality” joybarı sheńberinde shólkemlestirildi.
«DMO Karakalpakstan» házirgi waqıtta Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondınıń sociallıq buyırtpalar tańlawınıń jeńimpazı bolıp, “QR Gastronomic Quality: Qaraqalpaqstannıń tartımlılıǵın arttırıw ushın gastronomiyalıq turizm xızmetleriniń sapasın bahalaw hám jaqsılaw” joybarın ámelge asırmaqta. Joybar gastronomiyalıq xızmetlerdiń sapasın arttırıw hám regionnıń turistlik potencialın rawajlandırıwǵa qaratılǵan.
Seminar-treningti Qaraqalpaqstan Respublikası Aspazlar birlespesiniń Nókis qalasındaǵı aymaqlıq bóliminiń baslıǵı Gúlmırza Yuldashev alıp bardı.
Ilajda jámiyetlik awqatlanıw orınlarında xalıqaralıq standartlarǵa hám sanitariyalıq normalarǵa muwapıq azıq-awqat ónimleriniń sapasın, gigienasın hám qáwipsizligin basqarıw sistemaların engiziw máseleleri dodalandı.
Seminarǵa kafe, restoran hám shayxanalardıń iyeleri hám basqarıwshıları, kafe hám restoranlardıń aspazları, oficiantlar, zal basqarıwshıları, gastronomiyalıq joybarlardıń wákilleri, sonday-aq, servis tarawına qızıǵıwshı jaslar qatnastı.
Seminardıń maqseti – azıq-awqat ónimleriniń sapası hám qáwipsizligin támiyinlew boyınsha ámeliy kónlikpelerdi qáliplestiriw, sonday-aq, xızmetkerler hám basshılardıń juwapkershiligin arttırıwdan ibarat.
Sonday-aq, seminarda sapa hám gigiena qadaǵalaw sistemalarınıń xalıqaralıq tájiriybeleri, Ózbekstannıń sanitariyalıq nızamshılıǵı talapları, azıq-awqat gigienası hám qáwipsizligi, ishki qadaǵalaw hám sapa auditi quralları tuwralı da keń túrde maǵlıwmatlar berilip, pikir-usınıslar bildirildi.
Seminarda qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.