Sholıw

Házirgi kúnge shekem “Ózbekstan – 2030” strategiyasınıń jáne de bayıtılǵan, jańa redakciyadaǵı joybarı keń jámiyetshilik tárepinen qızǵın dodalandı hám kóplegen pikir-usınıslar bildirildi. Búgin, 28-yanvar kúni jámiyetlik dodalaw juwmaqlanadı. Maǵlıwmatlarǵa qaraǵanda, derlik bir ay dawamında watanlaslarımızdan 3 mıń 200 den aslam pikir-usınıslar kelip tústi.
Strategiya joybarında barlıq baǵdarlarda bir qatar maqsetli kórsetkishler, áhmiyetli turmıslıq wazıypalar óz kórinisin tapqanı itibarǵa ılayıq. Atap aytqanda, xalıqtıń salamatlıǵın saqlaw, keselliklerdi erte anıqlaw hám aldın alıw, emlew ilajların jedellestiriw baǵdarında áhmiyetli maqsetler, wazıypalar názerde tutılǵanı millet genofondın saqlaw, elimiz xalqınıń salamatlıǵın bekkemlewde úlken áhmiyetke iye.
Ásirese, onkologiyalıq keselliklerdi erte anıqlaw hám ólimshilik kórsetkishin azaytıw baǵdarında belgilenetuǵın maqset-wazıypalar sońǵı jıllarda kóbeyip atırǵan bul qáwipli kesellikti óz waqtında anıqlaw hám emlew ilajların kóriwde ayrıqsha orın iyeleydi.
Atap aytqanda, strategiya joybarında 2030-jılǵa shekem barlıq qáwipli óspeler anıqlanǵan nawqaslardı emlew menen 100 procent qamtıp alıwın támiyinlew wazıypası názerde tutılmaqta. Mámleketimizde onkologiyalıq keselliklerdi anıqlaw hám óz waqtında emlew baǵdarında áhmietli ilajlar ámelge asırılıp atırǵanın, bul baǵdardaǵı is-háreketlerge mámleketlik byudjetten belgili muǵdarda qarjılar ajıratılıp atırǵanın atap ótiw kerek. Endi bul strategiyalıq hújjet sheńberinde usı baǵdardaǵı jumıslar jáne de jedellesedi, xalıqtıń salamatlıǵın saqlaw máselelerine jáne de izbe-izlik penen qatnas jasalmaqta.
Bunnan tısqarı, strategiya joybarında rak keselligi menen 1 jıl ishinde ólim kórsetkishi 15 procentten joqarı bolmawına erisiw, eresekler arasında (40 jas hám onnan úlken) qantlı diabetti erte anıqlanıw kórsetkishin 70 procentke shekem arttırıw maqsetleri de názerde tutılmaqta.
Bul maqsetler xalıq arasında salamat turmıs tárizin engiziw baǵdarındaǵı jumıslardan baslap keselliklerdi erte anıqlaw hám emlew baǵdarındaǵı ámeliy háreketlerdi jáne de joqarı basqıshqa kóteredi. Eń tiykarǵısı, xalıqtıń salamatlıǵın saqlawǵa xızmet etedi.

Muhtarama Komilova,
ÓzA