Búgingi kúnde ekologiya hám qorshaǵan ortalıqtı qorǵaw máselesi eń áhmiyetli mashqalalardan birine aylanıp barmaqta. Tómengi palatanıń májilisinde ekologiya, qorshaǵan ortalıqtı qorǵaw hám tábiyattan aqılǵa uǵras paydalanıw tarawındaǵı huqıqbuzarlıqlardı tártipke salıwǵa qaratılǵan nızam joybarı ekinshi oqıwda dodalandı.
– Nızam joybarı menen qorshaǵan ortalıqtı qorǵaw tarawındaǵı nızamshılıq talaplarınıń buzılıwınıń aldın alıw, atap aytqanda, dáryalardıń ańǵarların tazalaw hám jaǵalıqların bekkemlew jumısların ámelge asırıw tártibin buzıw, suw resursların pataslandırıw, terekler hám putalardı nızamsız túrde kesiw yamasa joq etiw, olardı qorǵaw ilajların kórmew, sonday-aq, atmosfera hawasın pataslaw menen baylanıslı jaǵdaylarǵa juwapkershilik kúsheytilmekte, – deydi Nızamshılıq palatasınıń komitet baslıǵı X.Ǵafforov. – Joybar menen “Tábiyattı qorǵaw haqqında”ǵı, “Ósimlik dúnyasın qorǵaw hám onnan paydalanıw haqqında”ǵı nızamlar jáne Hákimshilik juwapkershilik haqqındaǵı kodekske tiyisli ózgerisler hám qosımshalar kirgizilmekte.
Atap aytqanda, dárya ańǵarlarınan rudalıq emes materiallardı nızamsız qazıp alıw, suw resursların pataslandırıw, terek hám putalardı nızamsız kesiw yamasa joq etiw, pataslandırıwshı zatlardı belgilengen normadan artıq muǵdarda atmosfera hawasına shıǵarıw, qurılıs maydanlarında shań hám qum bóleksheleriniń hawaǵa kóteriliwin saplastırmaw, sonday-aq, janıw ushın mólsherlenbegen orınlarda yamasa qurılmalarda janılǵı, zatlar hám shıǵındılardı jaǵıw jaǵdayları ushın yuridikalıq táreplerge finanslıq sankciyalar engiziletuǵını belgilenbekte.
Sonıń menen birge, ıssıxanalarda, óndirislik imaratlarda yamasa janıw úskenelerinde shinalar, bitum, mazut, plyonka, sintetikalıq karton, rezina, jún talshıǵı hám sol sıyaqlı zıyanlı komponentlerdi óz ishine alǵan shıǵındılardı jaǵıw da hákimshilik juwapkershilikke sebep boladı, – dedi deputat.
Sonday-aq, nızam joybarında sanaat hám basqa túrdegi shıǵındılardı jıynaw, tasıw, jaylastırıw, zıyansızlandırıw, saqlaw, utilizaciyalaw, qayta islew yamasa realizaciyalaw processlerinde tábiyattı qorǵaw talaplarına ámel etpegeni ushın da finanslıq sankciyalar qollanılıwı da názerde tutılmaqta.
Dodalawlarda bir qatar sorawlar kóterildi hám nızam baslamashıları tárepinen tiyisli juwaplar qaytarıldı. Bunnan soń nızam joybarı deputatlar tárepinen qabıl etilip, Senatqa jiberildi.

Muhtarama Komilova,
Asliddin ALIJANOV (súwret), ÓzA