Biznes-ombudsman apparatı tárepinen 2025-jılda isbilermenlerdiń huqıqların qorǵaw boyınsha ámelge asırılǵan jumıslardıń juwmaǵına baǵıshlanǵan brifing ótkerildi.

Esabattı Málimleme xızmetiniń basshısı Guljamol Shukurova oqıp esittirdi.
Brifingte málim etiliwinshe, 2025-jıl dawamında Biznes-ombudsmanǵa jámi 9 555 múrájat kelip túsken. Kórip shıǵılǵan múrájatlardıń derlik 48 procenti qanaatlandırılıp, olar boyınsha isbilermenlerdiń huqıqları tiklenip, qalǵan múrájatlar boyınsha huqıqıy túsinikler berilgen.
Anıq statistikaǵa bola, múrájatlardıń tiykarǵı bólegi Tashkent qalası, Tashkent wálayatı hám Qashqadárya wálayatınıń úlesine tuwra keledi eken. Eń kóp múrájatlar salıq, jer hám kadastr, lawazımlı shaxslardıń qararları, sonday-aq, tekseriwler hám bank-kredit máselelerine baylanıslı bolǵan.
“Isbilermenler menen sóylesiwde áhmiyetli platforma bolǵan “Isbilermen virtual ofisi” arqalı da jedel jumıs alıp barıldı. Bul platformaǵa 7 507 múrájat kelip túsip, olarda kóterilgen 8 640 másele kórip shıǵıldı. Bul sanlar isbilermenler mámleketlik uyımlarǵa kóbirek elektron múrájat etip atırǵanın kórsetedi,” – dedi G.Shukurova.
2025-jılı isbilermenlerdiń huqıqların qorǵaw sheńberinde jámi 3 mıń 241 tásir ilajı qollanılǵan. Nátiyjede:
220 nızamsız qarar biykar etildi;
10 mlrd sum qarjı isbilermenlerge qaytarıldı;
16 mlrd sum qarızdarlıq biykar etildi;
40,1 mlrd sum subsidiya qarjılarınıń ajıratılıwına erisildi.
“Ótken jılı tekseriwler máselesi de turaqlı itibar orayında boldı. 2025-jılı 148 mıńnan aslam tekseriwler muwapıqlastırılǵan. Monitoring nátiyjesinde 9 994 nızambuzıwshılıq jaǵdayları anıqlandı, sonnan 567 si nızamsız tekseriwler, 9427 si tekseriwler ótkeriw tártibin buzıw jaǵdayları bolıp esaplanadı. Bul jaǵdaylarǵa jol qoyǵan lawazımlı shaxslarǵa 1072 hákimshilik sharalar qollanıldı hám 103 jınayıy juwapkershilikke tartıw boyınsha usınıslar tiyisli huqıq qorǵaw uyımlarına jiberildi”, – delinedi Biznes-ombudsman apparatı tárepinen ótkerilgen brifingte.
Sonıń menen birge, ótken jıl dawamında qadaǵalawshı uyımlardıń xızmetkerlerine tekseriw ótkeriw baǵdarındaǵı nızamshılıq tártiplerin túsindiriw maqsetinde 462 seminar ótkerilip, olarda 26 mıńnan aslam lawazımlı shaxslar qatnasqan.
Sonday-aq, qadaǵalawshı uyımlardıń 8 682 xızmetkeri attestaciyadan ótkerilip, olardıń 76 procenti isbilermenlerdiń jumısında tekseriw ótkeriwde jeterli mamanlıqqa iye dep tabılǵan.
“2025-jıl dawamında nızamshılıq orınlanıwın qadaǵalaw sheńberinde 14 qadaǵalaw uyımınıń jumısı úyrenilip, 105 mıńnan aslam nızambuzıwshılıq jaǵdayları anıqlandı. Bul jaǵdaylar boyınsha usınıs xatları kirgizilip, hákimshilik hám intizamıy sharalar qollanıldı.
Sonday-aq, nızamshılıqtı jetilistiriw baǵdarında da sistemalı jumıslar ámelge asırıldı. 2025-jılı 6 nızamshılıq hújjetiniń joybarı islep shıǵıldı, 898 normativlik-huqıqıy hújjet huqıqıy ekspertizadan ótkerildi, olar boyınsha 780 usınıs hám narazılıqlar bildirildi”, – dedi Biznes-ombudsman apparatı Málimleme xızmetiniń basshısı Guljamol Shukurova.

ÓzA