Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisinde “Ózbekstan – 2030” strategiyasında názerde tutılǵan xalıqaralıq qatnasıqlar, sırtqı ekonomikalıq baylanıslardı keńeytiw, investiciyalıq tartımlılıqtı arttırıw jáne turizm tarawın rawajlandırıwǵa qaratılǵan tiykarǵı wazıypalar dodalandı.
Mámleketimiz basshısınıń Oliy Majlis hám Ózbekstan xalqına jollaǵan Múrájatınan kelip shıqqan halda “Ózbekstan-2030” strategiyasında mámleketimizdiń xalıqaralıq imidjin bunnan bılay da arttırıw, sırt el investiciyaların tartıw, eksport kólemin bunnan bılay da arttırıw hám turizmdi rawajlandırıw ilajlarına ayrıqsha itibar qaratılmaqta.
Atap aytqanda, sırtqı siyasat koncepciyası jetilistirilip, jaqsı qońsıshılıq baylanısları keńeytiledi. Milletleraralıq tatıwlıqtı bekkemlew, sırt eldegi watanlaslarımızdı qollap-quwatlaw, mámleketimizdiń investiciyalardı tartıw strategiyası, milliy eksport geografiyasın diversifikaciyalaw, sonday-aq, xalıqaralıq finans institutları menen birge islesiw jáne de jedellestiriledi.
Jańa turizmdi rawajlandırıw strategiyası sheńberinde mámleketimizdiń turistlik potencialın xalıqaralıq kólemde úgit-násiyatlaw, turizm infrastrukturasın modernizaciyalaw, xızmetlerdiń sapasın arttırıwǵa qaratılǵan ilajlar da dodalandı.
Senatorlar “Ózbekstan-2030” strategiyasında belgilengen wazıypalardıń óz waqtında hám sapalı orınlanıwın támiyinlewde parlamentlik qadaǵalawdı kúsheytiw, mámleketlik uyımlar hám jámiyetlik shólkemler arasındaǵı birge islesiwdi bunnan bılay da bekkemlew áhmiyetli ekenligin atap ótti.

N.Abduraimova, ÓzA