Shımbay rayonlıq jaslar orayı imaratında Jınayat isleri boyınsha Shımbay rayonı sudınıń baslıǵı A.Uspanov basshılıǵında kóshpeli sud májilisi bolıp ótti.
Onda Ózbekstan Respublikası Jınayat kodeksiniń 248-statyası 1-bólimi menen ayıplanǵan E.D.nıń hám Jınayat kodeksiniń 169-statyası 3-bólimi “b” bánti menen ayıplanǵan P.J.ǵa toplanǵan jınayat isleri kórip shıǵıldı.
Sudlanıwshı E.D. óz ayıbın tolıq moyınlap, pushaymanlıq bildirgeni sebepli, jınayat isleri boyınsha Shımbay rayonı sudınıń húkimi menen oǵan Ózbekstan Respublikası Jınayat kodeksiniń 248-statyası 1-bóliminde názerde tutılǵan jınayattı islegenlikte ayıplı dep tabılıp, oǵan usı statya menen járiyma jazası tayınlandı.
Sonday-aq, kóshpeli sud májilisinde sudlanıwshı P.J. da óz ayıbın tolıq moyınlap, pushaymanlıq bildirgeni, jábirleniwshige jetkerilgen materiallıq zıyanlar tolıq qaplanǵanlıǵı sebepli, sud húkimi menen sudlanıwshı P.J. Ózbekstan Respublikası Jınayat kodeksiniń 169-statyası 3-bólimi “b” bántinde názerde tutılǵan jınayattı islegeni ushın ayıplı dep tabılıp, oǵan usı statya menen JKniń 57-statyasın qollanǵan halda hár aylıq miynet haqısınıń 10 procentin mámleket dáramatına uslap qalǵan halda 2 jıl múddetke miynet penen dúzetiw jumısları jazası tayınlandı.
Sonıń menen birge, Shımbay rayonı Ishki isler bólimi JHQ Probaciya toparı esabında jaza ótep atırǵan 5 puqara jazanı ótew tártip-qaǵıydalarına jaqsı múnásibette bolǵanı, islegen qılmısınan shın kewilden pushaymanlıǵın inabatqa alıp, Ózbekstan Respublikası Jınayat kodeksiniń 73-statyasına tiykarlanıp jazadan múddetinen aldın shártli azat etildi.
Sud májilisiniń juwmaǵında sud baslıǵı tárepinen Ózbekstan Respublikası Prezidenti tárepinen sud tarawına baylanıslı jańadan qabıl etilgen pármanlar haqqında huqıqıy túsindiriw jumısların alıp bardı.

Qaraqalpaqstan xabar agentligi