Búgingi kúnde respublika boylap máhálle hám awıl puqaralar jıyınlarında Prezident Múrájatınıń mazmun-mánisin xalıqqa jetkeriw boyınsha úgit-násiyat jumısları alıp barılmaqta.
Atap aytqanda, Beruniy rayonındaǵı “Serquyosh” mákan puqaralar jıyınında máhállede jasawshı puqaralardıń qatnasıwında ÓzLiDePten Xalıq deputatları Beruniy rayonlıq Keńesi deputatlarınıń qatnasıwında úgit-násiyat ilajı ótkerildi. Ilaj “Siyasiy aǵartıwshılıq maydanı” joybarı sheńberinde “Ózbekstan – 2030″ strategiyası: siyasiy reformalardıń tiykarı” atamasına baǵdarlandı.
Ilaj dawamında Prezident Sh.Mirziyoevtiń Oliy Majlis hám Ózbekstan xalqına jollaǵan Múrájatında belgilep berilgen 6 tiykarǵı baǵdar, sonday-aq, jetilistirilip atırǵan “Ózbekstan – 2030” strategiyasınıń tiykarǵı maqset hám wazıypaları haqqında tolıq maǵlıwmat berildi.
Atap ótilgenindey, Jańa Ózbekstanda ámelge asırılıp atırǵan reformalar insan qádiri, ádillik, ashıq-aydınlıq hám juwapkershilik principlerine tiykarlanıp, mámlekettiń turaqlı rawajlanıwın támiyinlewge xızmet etpekte.
Sonıń menen birge, “Ózbekstan – 2030” strategiyasınıń joybarı keń jámiyetshiliktiń dodalawı tiykarında islep shıǵılǵanı hám xalıqtıń pikir-usınısları inabatqa alınǵanı atap ótildi.
Ilajda qatnasqan máhálle belsendileri Prezident tárepinen belgilep berilgen tiykarǵı wazıypalar Jańa Ózbekstanda insan qádiri, ádillik hám abadanlıqtı támiyinlewde áhmiyetli baǵdarlama bolıp xızmet etetuǵının ayrıqsha atap ótti.

Qaraqalpaqstan xabar agnetligi