Nókis qalasında Qaraqalpaqstan Respublikası Joqarǵı Keńesi, Ózbekstan Respublikası Ministrler Kabineti janındaǵı Migraciya agentligi, Qaraqalpaqstan Respublikası Kámbaǵallıqtı qısqartıw hám bántlik ministrliginiń shólkemlestiriwinde puqaralardıń jumıs penen bántligin támiyinlew, sırt ellerde nızamlı miynet etiwine járdemlesiw maqsetinde «Sırt elde jumıs» miynet yarmarkası ótkerildi.
Yarmarkada Tashkent qalasınan kelgen jeke menshik bántlik agentlikleri tárepinen tiykarınan Evropa awqamına kiriwshi mámleketler hám Koreya Respublikasında bar bolǵan jumıs orınları usınıs etilip, qatnasıwshılarǵa ol jerlerdegi jumıs sharayatları, miynet haqı, jasaw hám sociallıq kepillikler haqqında keń túrde maǵlıwmatlar berildi.
Qatnasıwshılar sırt elde jumıs islew tártibi, hújjetlerdi rásmiylestiriw hám til úyreniw máseleleri boyınsha qánigelerden másláhátler aldı.
– Yarmarkaǵa Tashkent qalasınan kelgen jeke menshik bántlik agentlikleriniń wákilleri qatnasıp, Germaniya, Slovakiya, Latviya, Litva, Estoniya, Koreya mámleketlerinde bar bolǵan xızmet kórsetiw, qurılıs hám sanaat tarawları boyınsha bos jumıs orınların usınıs etpekte, – deydi Ózbekstan Respublikası Ministrler Kabineti janındaǵı Migraciya agentligi Qaraqalpaqstan filialı bas qánigesi Amanbay Allaniyazov. – Puqaralar óz qánigelikleri boyınsha hújjetlerin tapsırǵannan soń, ekinshi basqıshta jumıs beriwshiler menen sáwbetlesiwden ótedi hám bunnan soń sırt ellerge jumıs ushın viza shıǵadı.
Sonday-aq, yarmarka sheńberinde puqaralar Nókis qalası, Nókis, Qanlıkól hám Bozataw rayonları kámbaǵallıqtı qısqartıw hám bántlik bólimleri tárepinen de ózlerinde bar bolǵan bos jumıs orınları menen tanısıp, bólim xızmetkerlerinen tiyisli maǵlıwmatlar aldı.

Qaraqalpaqstan xabar agentligi