Ózbekstan Respublikası Prezidenti janındaǵı Isbilermenlik subektleriniń huqıqları menen nızamlı máplerin qorǵaw boyınsha wákillik apparatınıń respublikamızdaǵı sektorı, Májbúriy orınlaw byurosı hám Sawda-sanaat palatasınıń Qaraqalpaqstan Respublikası basqarmalarındaǵı tiyisli taraw wákilleri menen Qaraqalpaqstan Respublikası Hákimshilik sudınıń sudyaları G.Baynazarova, K.Xojamuratov hám J.Aymaganbetovalardıń qatnasıwında oqıw-seminarı bolıp ótti.
Seminarda sud ámeliyatında nızam hújjetleriniń birdey qollanılıwın támiyinlew, puqaralar hám isbilermenlik subektleriniń huqıqları menen nızamlı máplerin nátiyjeli qorǵawǵa qaratılǵan áhmiyetli máseleler hár tárepleme dodalandı. Atap aytqanda, Ózbekstan Respublikası Joqarǵı sudı Plenumınıń 2025-jıl 24-noyabrdegi 23-sanlı qararı menen bir qatar qararlarǵa kirgizilgen ózgerisler hám qosımshalardıń áhmiyeti keńnen sáwlelendirildi. Bul ózgerisler kredit hám girew qatnasıqları, orınlaw isin júrgiziw hám jerge baylanıslı kelispewshiliklerdi kórip shıǵıw tártibin jetilistiriwge qaratılǵanı atap ótildi.
Sudyalar tárepinen kreditti múddetinen aldın óndiriw shártleri, girewdegi múlkke óndiriw qaratıw tártibi, jer ijarası qatnasıqlarında júzege kelip atırǵan kelispewshiliklerdi sheshiwde birden-bir qatnastı támiyinlew, sonday-aq, prokuror qatnasıwınıń májbúriy jaǵdayları boyınsha anıq túsinikler berildi. Ámeliyatta ushırasıp atırǵan mashqalalar, sud ámeliyatındaǵı ayırmashılıqlar hám olardı saplastırıw jolları dodalandı.
Ashıqtan-ashıq sóylesiw túrindegi ótkerilgen seminarda qatnasıwshılar tárepinen sorawlar berilip, sudyalardan nızam normaların durıs qollanıw boyınsha anıq mısallar tiykarında juwaplar aldı.

Qaraqalpaqstan xabar agentligi