Usı jıldıń 19-26-yanvar kúnleri Tashkent qalasında shaxmattıń standart jónelisi boyınsha 6 jasqa shekemgi er balalar hám qızlar arasında Ózbekstan chempionatı bolıp ótti.
Bul chempionatta qızlar arasında múnásip qatnasqan Taqıyatas rayonı 2-sanlı mektepke shekemgi bilimlendiriw shólkeminiń tárbiyalanıwshısı Larina Darina sıylı 2-orındı iyelep, gúmis medalın hám Aziya chempionatına qatnasıw ushın jollamanı qolǵa kirgizdi.
Darina ájapası Zarina ekewi sporttıń shaxmattıń túrine qızıǵadı. Olardıń shaxmat oynawǵa degen qızıǵıwshılıǵın sezgen ata-anası Taqıyatastaǵı shaxmat dógeregine alıp baradı. Ol jerde olar tájiriybeli trener Abdirkerim Turaevtan shaxmattıń ózine jarasa sırların úyrenip kelmekte.
Onıń ájapası Zarina házirgi waqıtta Taqıyatas rayonındaǵı 2-sanlı ulıwma bilim beriw mektebiniń 2-klasında bilim almaqta. Ol shaxmat sport túri boyınsha bir qansha tabıslardı qolǵa kirgizgen. Ájapasınıń shaxmatqa degen qızıǵıwshılıǵın kórip shańaraqta birge shaxmat oynap, dógerekke de izine erip baratuǵın Darina da óziniń shaxmattaǵı tabısların qolǵa kirgize baslaydı. Ol 6 jasqa shekemgi er hám qızlar arsında ótkerilgen Qaraqalpaqstan chempionatında birinshilikti qolǵa kirgizedi. Búgin ol Ózbekstan chempionı. Endi ol Qıtayda ótkeriletuǵın Aziya chempionatında qatnasadı.
-Qızlarımnıń ekewi de shaxmatqa ıqlası kúshli. Zarina úkesi menen bos waqıtlarda úyde shaxmat oynaytuǵın edi. Sol sebepli ol da ájapası sıyaqlı shaxmatqa qızıǵıp ketti. Shaxmat tek ǵana aqıl gimnastikası emes al, fizikalıq kúsh talap etetuǵın sport túri. Sebebi, jarıslarda kúnine 2 partiyadan oynaytuǵın bolsa hár qaysısı 2, 3 saattan dawam etedi. Aqıl menen sheshiletuǵın bul sport túrinde tikke otırıp oyındı dawam etiwi ushın sportshı hár tárepleme salamat bolıwı kerek. Sonlıqtan da biz olardıń densawlıǵına, awqatlanıw rejimine jeterlishe itibar qaratıp atırmız. Mine Darina da úlken jarıslarǵa qatnaspaqta. Olardıń ekewinen de úmitlerimiz kóp,-deydi anası Nasiba Qabulova.

G.Turdıshova, Qaraqalpaqstan xabar agentligi