Búgin erte tańnan jer betin qaplaǵan appaq qar bárshege joqarı keypiyat baǵıshlap, qıs máwsimine jarasa tábiyatqa gózzal sán qostı. Tábiyat appaq qarǵa búrkenip, hawa tazarıp, daraqlar ásirese shırshalar «siynesine» qonǵan appaq lipastan júdá shıraylanıp ketti. Bul tábiyattıń gózzal peyzajı kimdi bolsa da kewlin quwanıshqa toltırıp, balalar qar urısıp oynasa, jańa texnologiyanı qollarına kóterip júrgen zamanlaslarımız sol qol telefonlarına súwretke túsip búgingi kún, erteńgi tariyx ushın mórlep qoymaqta.
Taza hawa. Tereńnen dem alıp, ókpeńdi biyminnet tolıtırıp nápes alatuǵın tábiyattıń bul inamı qardıń «qúdireti» menen bárshemizge kópten kútken taza hawanı berdi. Tazarıp, jańalanıp, qalǵan tábiyattıń bul qúdireti erte tańda kimdur jumısqa, kimdur oqıwǵa baratırǵan zamanlaslarımızdıń appaq qar betine túsken dáslepki qádemleri menen «ǵarsh-ǵarsh» etip shıqqan dawısları janǵa kútá jaǵımlı esitiledi. Aytpaqshı, «men mánzilime qalay jetip baraman. Búgin jolda kólikler barmeken ózi?»,-dep qáweterlengenlerdiń bul oyǵa barıwı orınsız bolıp, keshe ǵana respublika basshısınıń tapsırması menen jolǵa qoyılǵan elektrobuslar hám kúndelikli júrip turǵan marshrutlardıń búgin de úzliksiz xızmet atqarıp atırǵanlıǵı biziń uzaǵımızdı jaqın etpekte. Jol basqarması hám abadanlastırıw xızmetkerlerine alǵısımız sheksiz. Transportlardıń mánzillerine jaqsı jetip barıwı ushın xalqımız ushın erte tańnan óz xızmet wazıypalarına kirisip jollardı qardan tazalap suwıqtı da, qardı da pisent etpey miynet etip atırǵanlıǵı ushın qansha minnetdar bolsaq arzıydı.
Usı orında birinshi qalıń qardan ilhamlanıp jazǵan shayır Gúlnara Nurlepesovanıń «Qar jawıp atır…» qosıǵı kewillerge jáne de joqarı keypiyat baǵıshlap, tábiyatqa súyispenshilińdi asıradı.
Daraqlar aq qarlar jamılıp,
Appaq móldir sırǵa taǵınıp.
Appaq qardı qalǵan saǵınıp,
Júregime qar jawıp atır.

Appaq bolıp aǵarǵan tańlar,
Appaq mamıq yańlı aq qarlar.
Appaq kewlim aq qarǵa qardar,
Tilegime qar jawıp atır.

Appaq qarǵa toyınsın jerler,
Appaq qardan kógergey eller.
Suwǵa tolsın dáryalar,kóller,
Tınbastan aq qar jawıp atır!

Qutlı bolsın qayırlı kúniń,
Qarlı taza hawalı kúniń.
Nesiybeli bolǵay tórkiniń,
Haq kewlime nur jawıp atır.

Elemesseń qısqı salqındı,
Kórinisler qanday tartımlı!
Quwandırıp gúllán xalqımdı,
Nókisimde qar jawıp atır.

Qanday jaqsı bul hal biradar,
Jer toyınıp qardan nur alar.
Qar saǵınǵan xalqım quwanar,
El ırısı qar jawıp atır.
Awa, qar jawıp atır. Appaq qar. Qar menen qosıla kókten diyqan -fermer hám sharwalarımız ushın tábiyattıń ırısqı-nesiybesi, xalqımızdıń molshılıqtan úmitleri, taza hawa deregi, gózzallıq kórinisi jawıp atır.
-Ata, dalaǵa shıǵaman. Qar oynayman. Meni shana menen aydaysańǵo ya,-degen kishkeneniń shiyrin sózinen ilhamlanıp ketken atası qoranıń basına ılaqtırıp qoyǵan bayaǵı shanası menen asay-masaydı izlep, «ha kempir, ana balanı oyatsańo. Bayaǵı shananı tappay atırman. Maǵan izlesip jibersin, asay-masay qayda» dep qońsınıń úy betinen shıǵıp atırǵan dawıslar jıllı batareyanıń túbinde múlgip otırǵan kepir-ǵarrılardı da yoshlandırıp jibergen qar boldı-aw, bul deymen.
Bul qar tınıshlıq, molshılıq, awızbirshilikte jasap atırǵan xalqımızdıń búgingi kúnine jarasqan qar bolsın. Appaq arzıwlar menen gózzal kóriniske bólengen, appaq kelinshek lipasındaǵı máliykalar kibi biyǵubar tábiyat inamı. Seni jıllı kewiller menen kútip aldıq appaq qar. Tábiyattıń gózzal peyzajı. Jer kóksine xosh kelipseń, appaq qar.

G.Turdıshova, Qaraqalpaqstan xabar agantligi