Ózbekstan tariyxta birinshi márte Evropa Awqamınıń eń iri hám eń básekige shıdamlı ilimiy-innovaciyalıq baǵdarlaması – “Horizon Europe” qatnasıwshısına aylandı. Mámleketimizdiń ilimi hám joqarı bilimlendiriw sistemasınıń rawajlanıwında áhmiyetli burılıs noqatı sıpatında tán alınıp atırǵan bul waqıya globallıq ilimiy-texnologiyalıq maydandaǵı ornımız bekkemlenip atırǵanın ańlatadı.
Tańlawda jeńimpaz bolǵan Tashkenttegi Xalıqaralıq Vestminster universiteti, Geologiya ilimleri universiteti hám “Ózbekstan texnologiyalıq metallar kombinatı” AJ xalıqaralıq “TiBeRIUM” joybarınıń quramına kirdi. Bul baǵdarlama Evropa ushın strategiyalıq áhmiyetke iye bolǵan titan hám berilliy resursların tereń úyreniw, usı elementlerdi ekologiyalıq jaqtan nátiyjeli qayta islew arqalı turaqlı támiynat shınjırın qáliplestiriwge qaratılǵan.
Bizge belgili, EA tárepinen áhmiyetli shiyki zat sıpatında bahalanatuǵın titan hám berilliy aviaciya, energetika, “jasıl” texnologiya hám sanlı sanaatta keńnen qollanıladı, sanaattıń turaqlılıǵı hám texnologiya erkinligine tikkeley tásir kórsetedi. “TiBeRIUM” sheńberinde Ózbekstan 8,5 million evro grant aladı. Bul EA baǵdarlaması arqalı házirge shekem usınılǵan eń iri ilimiy finanslıq derek bolıp esaplanadı.
Joybarda Germaniya, Ullı Britaniya, Norvegiya, Ispaniya, Belgiya, Finlyandiya, Polsha, Greciya, Kipr, Bolgariya, Qazaqstan hám Ózbekstannan jámi 25 shólkem qatnaspaqta.
Eń áhmiyetlisi, bul tańlaw elimiz ápiwayı shiyki zat jetkerip beriwshiden ilimiy izertlew, qayta islew texnologiyası hám joqarı maman kadrlar tayarlawǵa tiykarlanǵan modelge ótip atırǵanın kórsetedi. Óytkeni, sońǵı jılları respublikamız tek ǵana ilim ushın emes, al ekonomika ushın da joqarı dáramat, texnologiyalıq bilim hám uzaq múddetli rawajlanıw potencialın kórsetpekte.

Musulmon Ziyo, ÓzA